لە شاری ستۆکهۆڵمی پایتەختی سوید بە پێشەنگایەتیی پەژاک و کەژار مەراسیمێک بۆ یادی ڕێزان جاوید و ڕێناس ڕۆژ رێکخرا.  هەروەها لەو مەراسیمەدا یادی شەڕڤانان و فەرماندەکانی وەک بێریڤان زیلان و سۆسن بیرهات کرایەوە.

مەراسیمی یادکردنەوەکە بە خولەکێک ڕێزگرتن دەستیپێکرد. سەدان کوردستانیی هەر چوار پارچەی کوردستان ئامادەی  مەراسیمەکە بوون.

هۆڵی مەراسیمەکە بە وێنەکانی ڕێبەری گەلی کورد عەبدوڵا ئۆجالان و تێکۆشەرانی کورد ڕێزان جاوید و ڕێناس ڕۆژ ڕازێندرابوویەوە. بەشداربووانی مەراسیمەکە دروشمی "شەهید نامرێ"، "بمرێ خیانەت"یان دەوتەوە. لە مەراسیمەکەدا فیلمێک لەسەر ژیان و تێکۆشانی ئەو دوو فەرماندەیە نمایشکرا.

دوای ئەوە و لە بەردەوامیی ڕێوڕەسمەکەدا ژمارەیک پەیام پێشکەشکران و ڕاگەیاندرا، "ئەمڕۆ پێشەنگ و سەرکردەکانی کورد، کە لە بەشە جیاجیاکانی کوردستان فەرماندەیی دەکەن، بەهۆی تێکۆشانیانەوە دەکرێنە ئامانجی هێرشی دوژمنان، بەڵام گەل لە ناوخۆیدا یەکێتیی نەتەوەیی دروستکردووە و ئەمەش بۆ گەلی کورد زۆر گرنگە".

هەروەها لە یادەکەدا پەیامەکانی پەژاک و کۆدار خوێندرانەوە. چەندین حیزب و لایەنی سیاسی، هونەرمەندان و ڕۆشنبیران ئیدانەی تاوانەکانی دەوڵەتی تورکی داگیرکەریان کرد و بەڵێنیان دا، کە درێژە بە رێگا و ڕێبازی شەهیدان بدەن.

ژ.ت