چەند رۆژ بەر لە هەڵبژاردنی سەرۆکایەتی، لە زۆر شار ئۆپراسیۆنی پاکتاوی سیاسی لەدژی کورد و سۆسیالیستەکان ئەنجامدرا.

لە چوارچێوەی لێپرسینەوەی داواکاری کۆماری تەکرداغدا، بە شێوەیەکی هاوکات پۆلیس هەڵیکوتایە سەر ژمارەیەک ماڵ و ناونیشان.

راگەیەندرا کە لە چوارچێوەی لێپرسینەوەی 'ئەنجامێتی رێکخستن'دا ٣٠ کەس دەستگیرکران کە ٤ کەسیان لە چاناککالە بوون.

لەنێو دەستگیرکراوەکاندا عومەر فاروق کیریچ هاوسەرۆکی پارتی دیموکراتی گەلان لە شارەکە، سەزا بویوککلچ و تورگوت حاسکان بەڕێوەبەرانی هەدەپەی شارەکە، فەیسەل کوتلوئای هاوسەرۆکی پێشووی پارتی دیموکراتی هەرێمەکان (دەبەپە) لە چاناککالە محەمەد ئاکیورەک بەڕێوەبەری پارتی سەرلەنوێ بوژاندنەوەی سۆسیالیستی (سەیەکەپە) هەن.

سەرلەبەیانی ئەمڕۆش سەرباز و پۆلیس لە ناوچەی قۆسەر، نسێبین، ستەور و دێرک هەڵیانکوتایە سەر زۆر ماڵ. بەوهۆیەوە ١٣ کەس دەستگیرکران و راگەیەندرا دەستگیرکراوەکان بە تۆمەتی 'هاوکاریکردنی رێکخستن' دەستگیرکراون.

هەروەها لە چوارچێوەی لێپرسینەوەی داواکاری کۆماری مێرسین، لە مێرسین، ئەنقەرە، ئانتاڵیا، ئەدەنە و ئیزمیر پۆلیس هەڵیکوتایە سەر ٢٨ ماڵ و ناونیشان.

لە چوارچێوەی ئەو لێپرسینەوەیەی کە لەلایەن داواکاری کۆماری مێرسین بە بیانوی بڵاوکردنەوەکان لە تۆڕە کۆمەڵایەتیەکاندا بەڕێوە دەبرێت، پۆلیس هەڵیکوتایە سەر کۆمەڵەی پشتگیریکردن لە خانەوادەی زیندانی و سزادراوان لە چوکورئۆڤا و بەو هۆیەوە ٢٤ کەس دەستگیرکران. جگە لەوە لە ئەنقەرەش ژمارەیەک ئەندام و بەڕێوەبەری هەدەپە دەستگیرکران.

ف.ق