لە شاری هامبۆرگی ئەڵمانیا ئەندامانی تەڤگەری گەنجانی شۆڕشگێڕ (تەجەشە) لە چوارچێوەی هەڵمەتی "ئازادی بۆ ڕێبەر ئاپۆ، چارەسەری سیاسی بۆ پرسی کورد" بە ڕێپێوانێک گۆشەگیریان شەرمەزار کرد.

مەجلیسی گەلی هامبۆرگ و مەجلیسی ژنانی ڕۆژبین و هێزە ئەنتەرناسیۆنالیستەکان پشتگیرییان لە چالاکییەکە کرد و پانکارتی "ئازادی بۆ ئۆجالان"یان هەڵگرت، ئاڵا بە وێنەی ڕێبەر ئاپۆ و ئاڵای تەڤ_دەم بەرزکرایەوە، لە کەسێتی شەهید ڕۆژگەر هێلین و شەهید ئاسیا عەلی چالاکییەکە بە خولەکێک ڕێزگرتن لە شەهیدان دەستی پێ کرد.

لە ڕێپێوانەکەدا درووشمی "بژی سەرۆک ئاپۆ" و "بژی بەرخۆدانی زاپ" و "تیرۆریست ئەردۆگان" و "ژن، ژیان، ئازادی" و "زاپ ئاڤاشین مەتینا، بژی بەرخۆدانی گەریلا" بەرزکرایەوە.

لەسەر ناوی تەجەشە، زەلال چەولیگ ڕایگەیاند زانیاری دەربارەی ڕێبەر ئاپۆ نییە و بەمەش چارەسەری شەڕ لە کوردستان و ڕۆژهەڵاتی ناوین زەحمەتتر دەبێت، گوتی: "سبەی زۆر درەنگە، ئێستە کاتییەتی. کاتی ئازادکردنی ڕێبەرێتییە. وەرن لە ڕیزەکانی بەرخۆدان جێ بگرین".

چەولیگ ڕایگەیاند دەوڵەتی تورک بوێری لە بێدەنگی جیهان و ناتۆ وەردەگرێت، گوتی: "بەڵام ئەوان بوێری و ئیرادەی گەنجانی ئاپۆییان لەبیر کردووە. بانگەواز لە هەموو گەنجان دەکەم، وەرن شەقام بە شەقام، گەڕەک بە گەڕەک بەرخۆدان ڕێکخستن بکەین و گۆشەگیری بشکێنین".

بانگەوازی کرد بۆ بەشداربوون لە گردبوونەوەی کۆڵن لە ١٦ ی تشرینی دووەم بۆ ئازادی ڕێبەر ئاپۆ.