سەروەت باجاناک لە گەڕەکی ئیلکتریکی هاتای دەڵێت، بۆ خۆی چادرێکی دروست کردووە و لە ژێریدا دەمێنێتەوە.

باجاناک قسەی لەگەڵ ئاژانسی هەواڵی فورات (ANF) کرد و ڕایگەیاند، خێزانەکەم دوای ئەوەی لە بوومەلەرزەکە ڕزگاری بوو ڕۆیشت بۆ لای دایک و باوکی، بەڵام دووانیش لە ژێر داروپەردوەکاندا ماونەتەوە. باجاناک ڕایگەیاند، لە چوار ڕۆژی یەکەمدا کەس نەهاتە شەقامەکە و کەس بە هانامانەوە نەهات و وتی: "من لە ژێر داروپەردووەکانەوە بانگم دەکرد، بەڵام کەس وەڵامی نەدەدایەوە. دایکم و باوکم کۆچی دواییان کرد. دوای ٨ ڕۆژ توانیمان تەرمەکانیان دەربهێنین. من لێرە مامەوە. هەندێک جار دراوسێکان دێن.  نامەوێت لێرە بڕۆم، چونکە هیچ شوێنێک نییە بۆی بڕۆم".

باجاناک ڕایگەیاند، هاوژین و منداڵەکانی سێ ڕۆژ پێش ئێستا چوونە بۆ کەمپی بومەلەرزە لێدراون، بەڵام من لێرە مامەوە و وتی: "لێرە کەس نەماوە، من پاسەوانی بۆ گەڕەکە دەکەم، ئاگام لە ئاژەڵەکانە، کاتێک هاتن ماڵەکان بڕوخێنن، ڕەنگە بتوانم وێنەی دایکم و باوکم بدۆزمەوە و وەری بگرمەوە، بۆیە چاوەڕێم".

باجاناک ڕایگەیاند، بەهۆی نەخۆشییەوە ئامێر بەکاردەهێنێت و تەنها داواشی لە پۆلیس دابینکردنی کارەبا بووە بۆ شەقامەکە و ئەوەشی وت: 'ناتوانم بخەوم. ماوەی مانگێکە ناتوانم ئامێرەکە بەکار بهێنم. دەڵێم، بەلایەنی کەمەوە هێڵێک، وایەرێکی کارەبا ڕابکێشن، ئەگەر نەتوانم ئامیرەکە بەکار بهێنم، دەمرم. دەڵێن، 'بڕۆ قسە لەگەڵ بەڕێوەبەر بکە'، دەڵێم، لە کوێ بەڕێوەبەر ببینم؟ دەڵێن، بەڕێوەبەرەکەت لە ئەنقەرەیە".

باجاناک ڕاشیگەیاند، تەنیا خۆبەخشەکان هەندێک جار دێن بۆ لای و وتی: "زۆر زەحمەتە مرۆڤ تەنیا بێت، ناتوانم لەدەرەوەی گەڕەکەکەش بژیم، دراوسێکانم، کە بەیانیان زوو سڵاوم لێدەکردن ئیتر لێرە نین. یان ڕۆیشتوون، یان لە شوێنێکدا بەخاک سپێردراون. ئەمە دۆخێکی زۆر سەختە، بەڵام ئەگەر بشمرم لێرە ناڕۆم".

ژ.ت