ئەحمەد تەکین لەبەردەم زیندان لەلایەن بنەماڵەکەی و بەڕێوەبەرانی کۆمەڵەی پشتیوانی لە بنەماڵەی زیندانیان و حکومدراوانی مەڕمەڕەوە پێشوازیی لێ کرا.

تەکین لەبەردەم زیندانەکە قسەی کرد و تیشکی خستەسەر بانگەوازی "ئاشتی و کۆمەڵگەی دیموکراتیک"ـی ڕێبەر ئاپۆ و گوتی: "ڕێبەر ئاپۆ پرۆسەیەکی دەست پێ کرد و ئێمەش پشتگیری دەکەین. ئەگەر دەوڵەت هەنگاوبنێت، بەبڕوای من، پێشکەوتنێکی باش دەبێت".

زانراوە کە سبەی تەکین و بنەماڵەکەی دەگەنە مێرسین.

ئەحمەد تەکین لە ساڵی ١٩٩٣ لە مێرسین دەستبەسەرکرا و پاشان خرایە زیندان. دواتر بە تۆمەتی "تێکدانی یەکێتی و یەک‌پارچەیی دەوڵەت" سزای هەتاهەتایی بەسەردا سەپێنرا. لەو ماوەیەدا لە زیندانی کورکچولەری ئەدەنە و زیندانی کرکالە مایەوە. پاشان ڕەوانەی زیندانی ژمارە ٢ ی جۆری Tی بالیکەسیر کرا. تەکین لە ساڵی ٢٠٠٤ ئازادکرا، بەڵام لە ساڵی ٢٠٠٥ بە پاساوی ئەوەی "سزاکەی بە هەڵە حیسابکراوە" دووبارە خرایەوە زیندان.