لە ڕۆژانی ١٢، ١٣ و ١٤ ی مانگی کانوونی دووەمی ٢٠٢٤ ڕێکخستنەکانی ژنانی تەڤگەری ئازادی کۆمەڵگەی کوردستان لە وڵاتی نوروێژ بە دروشمی " ژن، ژیان،ئازادی" بە هیواوە بەرەو ڕێکخستن بۆ بەشداری لە شۆڕشی ژن " بە هاوکاری ئاکادیمیای ژنۆلۆژی یەکەم خولی پەروەردەی بۆ ژنانی باشوری کوردستان ئەنجامدا. لە خولەکەدا ١٥ ژنی وڵاتە جیاوازەکانی ئەوروپا بەشدارییان کرد.

لە خولە سێ رۆژییەکەدا بابەتەکانی وەک هەلومەرجی سیاسی و کۆمەڵایەتی باشوری کوردستان و عێراق، مێژووی بزوتنەوەی ئازادی ژنانی کوردستان و ژنۆلۆلۆژی پێشکەش کرا.  لە خولەکەدا جەخت لە سەر خودناسی، وشیاریکردنەوەی ژن لە مێژووی خۆی و پێویستی خۆڕێکخستنکردنی ژنان خرایە ڕوو.

لەو سێ ڕۆژەدا گفتوگۆیەکی چڕ لە سەر کێشەکانی کۆمەڵگەی کورد و ژنی کورد لە وڵاتانی ئەوروپا، پرسەکانی کوردستان و کاریگەری لەسەر کۆمەڵگە لە دەرەوەی وڵات کرا و هەروەها ئاماژە بە پێویستی بەشداری ژن لە چارەسەرکردنی کێشەکاندا کرا و گرنگی پێشەنگی ژنان لە ڕێکخستنکردنی ژنان و کۆمەڵگە بە گشتی خرایەڕوو لە بەشداری ڕاستەوخۆی تاکەکان لە چارەسەرکردنی کێشەکاندا. لە چارەسەریدا جەخت لەسەر فەلسەفە و پارادایمی مۆدێرنیتەی دیموکراتی کرایەوە کە لە پایەکانی دیموکراسی ڕاستەوخۆ، ئیکۆلۆژی و ئازادی ژن پێکدێت. ژنان لە گفتوگۆکاندا ئاماژەیان بە گرنگی ڕێبازەکانی زانستی ژن- ژنۆلۆژی کرد لە گۆڕینی زهنیەت و بنیاتنانی سیستەمێکی ئەلتەرناتیڤ کە وەڵامدەرەوەی پرسەکانی ڕۆژ و پرسە کەڵکەبووەکانە.

لە ئێوارانی خولەکەدا ژنان بەرنامەی هونەری و کولتوورییان ڕێکخست و یەک لەوانە نیشاندانی بەڵگەفیلمی هێزا شەنگالییە کە باس لە فەرمانداری یەکینەکانی ژنانی شەنگال دەکات کە لە هێرشەکانی ٢٠١٤دا لە لایەن داعشەوە دەڕفێنرێت، کۆیلەدەکرێت و کڕین و فرۆشتنی پێوە دەکرێت. پاش ئازادکردنی لە لایەن هێزەکانی یەپەژەوە بەشداری لە یەکینەکانی ژنانی شەنگال دەکات و دواتر وەک فەرماندارێک بەشداری لە ڕزگارکردنی ڕەقا دەکات، لەو شارەی کە کڕین و فرۆشتنی پێوەکرا لە لایەن داعشەوە".

ژنانی باشوری کوردستان کە زۆرینەیان ئەندامانی ڕێکخستنەکانی ژنانی تەڤگەری ئازادی کۆمەڵگەی کوردستان بوون و بەشێکیان لە چالاکوانانی مەدەنی پێکهاتبوون پلانسازییەکیان بۆ قۆناغی ئایندە داڕشت و دواتر بەشداری خۆیان لە " هەڵمەتی ئازادی بۆ ئۆجالان " ئەنجامدا.