ناوەندی ڕاگەیاندنی یەپەژە بە ڕاگەیاندراوێک ئاماژەی بەوەدا لە بەنداوی تشرین شەڕڤانیان لە ٧ی ئادار لە دژی چەتەکان چەند چالاکییەکیان ئەنجام دا.

لە ڕاگەیاندراوەکەدا ئاماژە بەوەکراوە لە بەرەی بەنداوی تشرین لە گوندی قەشلی نزیک گردی سریتەل، لە کاتژمێر ٤ی بەرەبەیانی کاتێک گروپێک چەتە لە ماڵێک بوون، مینێک تەقێنرایەوە و لە ئەنجامدا ٦ چەتە کوژران.

هەروەها گوترا: "کاتژمێر ١ی نیوەڕۆ لە چالاکییەکی سابۆتاژ لە دژی چەتەکان ئەنجام درا. لەو چالاکییەدا ماتۆڕی چەتەکان بە ئامانج گیرا و ٢ چەتەش کوژران. کاتێک چەتەکان ویستیان کوژراوەکەیان ببەن، ئۆتۆمبێلەکەیان لە لایەن یەکینەکانمانەوە کرایە ئامانج.

کاتژمێر ٣یش یەکینەکانی شەهید ڕوناهی یەکتا لە ئۆتۆمبێلی چەتەکانیان دا و لەوێش ٢ چەتە کوژران.

بە گشتیی لەو چالاکییانەدا ١٠ چەتەی داگیرکەر کوژران و ٣ چەتەی دیکەش بریندار بوون".

لە کۆتایی ڕاگەیاندراوەکەدا گوترا: "وەک یەپەژە ڕایدەگەیەنین بە فەلسەفەی 'ژن، ژیان، ئازادی' و ڕۆحی بەرخۆدانی ٨ی ئادار، لە دژی هەموو جۆرە داگیرکاری و کۆمەڵکووژی و ڕەگەزپەرەستییەک بەبێپچڕان لە تێکۆشانمان بەردەوامین. لەسەر بنەمای پاراستنی ڕەوا، گەلەکەمان و ژنان دەپارێزین".