ڕۆژنامەنوسان و ڕۆشنبیران ئیدانەى هەڵمەتى ڕەشبگیریی سەدان ڕۆژنامەنوس و ڕۆشنبیر و هونەرمەند دەکەن لەلایەن دەوڵەتى تورکەوە و دەڵێن: دەوڵەتی تورکیا سیاسەتێکی پۆلیسی و دیکتاتۆرییانە پەیڕەو دەکات.
لە بەیاننامەیەکدا زیاتر لە ١٠٠ ڕۆژنامەنوس و ڕۆشنبیر لەهەر چوار بەشی کوردستان بەتوندی ئیدانەى هەڵمەتى ڕەشبگیریی سەدان ڕۆژنامەنوس و ڕۆشنبیر و هونەرمەند و کەسایەتى سیاسی دەکەن، کە چەند ڕۆژێکە دەوڵەتى تورکیا لە باکوری کوردستان دەستیپێکردوە.
لەبەیاننامەکەدا، ئەو کەسایەتییانە لەگەڵ: ئەوەی، ئیدانە و سەرکۆنەی ئەو سیاسەتە نابەجێیە دەکەن، داوای دەستبەجێ ئازادکردنی دەستگیرکراوان دەکەن.
دەقى ڕاگەیەندراوەکە بەمجۆرەیە:-
بەناوی ئازادیی
بەیاننامەی ناڕەزایەتی ڕۆژنامەنووسان و ڕۆشنبیران:
دەوڵەتی تورکیا بە دەسەڵاتداریی ئاک-پارتی و مەهەپە، سیاسەتێکی پۆلیسی و دیکتاتۆرییانە پەیڕەو دەکات، هەموو ڕێبازەکانی زەبروزەنگ و سەرکوتکاریی لەبەرامبەر ڕۆژنامەنووسان و ڕۆشنبیران دەگرێتەبەر، لەوچوارچێوەیەشدا ٢٥ی نیسان، هەڵمەتێکی ڕەشبگیرییان لە ٢١ شاری باکووری کوردستان دەستپێکرد کە ناوەندەکەی شاری ئامەد بوو، بڕیاری دەستگیرکردن بۆ ٢١٦ کەس دەرچووە و لەو ژمارەیەش ١٢٨ کەسیان لە ڕۆژنامەنووس، هونەرمەند، ڕۆشنبیر، پارێزەر و نوێنەری ڕێکخراوە مەدەنەییەکان، کە ١١ کەسیان ڕۆژنامەنووسن لەوانە (سەرنووسەری ئاژانسی میزۆپۆتامیا عەبدولڕەحمان گۆک و ئەحمەد کانبال و محەمەد شا ئۆروچ، عوسمان ئەکین سەرنووسەری گشتی ڕۆژنامەی یەنی یەشام، کادری ئەسەن خاوەنی ئیمتیازی ڕۆژنامەی خۆبوون، ڕۆژنامەنووسی ئاژانسی ژننیوز بێریتان جانۆزەر و ڕۆژنامەنووس محەمەد یالچین، میکایل باروت، ساڵح کەلەش و ڕەمزی ئاککایا).
هەروەها پۆلیسی تورکیا دەستیان بەسەر هەموو کەلوپەلە ڕۆژنامەوانییەکانیاندا گرتووە، هەندێکیان لە ماڵی خۆیاندا بوون و هەڵیان کوتاوەتە سەر ماڵیان و ڕفێندراون، هەروەها لە مانگی حوزەیرانی ساڵی پاردا ١٦ ڕۆژنامەنووسیان دەستگیرکرد و تا ئێستاش دەیان ڕۆژنامەنووس لەسەر کاری پیشەییانەی خۆیان لە زیندانەکاندا قایمکراون و سزادراون، ئەمەش پێش هەموو شتێک پێچەوانەی یاسا نێودەوڵەتییەکان و ئازادی ڕادەربڕین و ڕۆژنامەگەریی و پێوەرەکانی دیموکراسیی و مافەکانی مرۆڤە، ئێمە وەک کۆمەڵێک ڕۆژنامەنووس، ڕۆشنبیر، چالاکوان، هونەرمەند و پارێزەر، لە هەرێمی کوردستان، ئیدانە و سەرکۆنەی ئەو سیاسەتە نابەجێیە دەکەین و داوای دەستبەجێ ئازادکردنی ڕۆژنامەنووسان و هەموو ئەو کەسانەی دیکە کە دەستگیر کراون دەکەین.
ناو و واژۆی و ڕۆژنامەنووسان و ڕۆشنبیر و چالاکوانان:
ف.ق
