کارە قێزەونەکانی چەتەکانی دەوڵەتی تورک بە هەموو جۆرێک بەردەوامە چ لە دزی و سەرانە وەرگرتن، چ لە کوشت و بڕ، چ لە بڕینی دارستانەکان و تاڵانکردنی کشتوکاڵی زەیتوون، هەر بەوەشەوە نەوەستاون پەلاماری گڵکۆ و مەزاری شەهیدان دەدەن و هەوڵی سڕینەوەی سیبموڵی تێکۆشانەکانی ئازادی دەدەن.

چەتەکانی دەوڵەتی تورک لە کردەوەیەکی قێزەونیاندا لەگەڵ هاتنی جەژنی ڕەمەزاندا  پەلاماری مەزار و گڵکۆی گۆڕی شەهیدان لە گۆڕستانی شەهیدان لە منبج دەدەن و هەموویان تێکشکاندووە.

بنەماڵەی شەهیدانی شاری منبج وەک نەریتێک لە بەرەبەیانی جەژنی ڕەمەزاندا کاتێک دەڕۆنە سەردانی گۆڕی ڕۆڵە شەهیدەکانیان، دەبینین چەتەکانی دەوڵەتی تورکی داگیرکەر گڵکۆیی گۆڕی ڕۆڵە شەهیدەکانیانی ڕووخاندووە و هەموو گۆڕەکانی تێکداوە، ئەمەش توڕەبوونی زۆری دایکانی جەرگ سوتایی لێکەوتووەتەوە.

دەیان دیمەن و وێنە لە تۆڕەکانی دیجیتاڵ میدیادا بڵابووەتەوە، کە وێرانکاری و شکانی گڵکۆی مەزاری شەهیدان نیشان دەدات. لە دیمەن و وێنەکاندا بەڕوونی دەردەکەوێت چۆن چەتەکانی دەوڵەتی تورک مەزاری شەهیدانیان تێکداوە لەو شار و جێگانەی کە داگیریکردوون.

لە بارەی تێکدانی مەزاری ڕۆڵەکانیانەوە، بنەماڵەی شەهیدان ئاماژە بەوەدەدەن تێکدان و شکاندنی مەزاری ڕۆڵەکانیان پێشلکردن و بێڕێزیکردنە بەرانبەر پیرۆزی شەهیدان و هەوڵدانە بۆ سڕینەوەی سیمبوڵی تێکۆشان و فیداکارییە.