سەرچاوە هەواڵییەکان ئاشکرایان کرد، گەڕاندنەوەی عێراقییەکان لە کامپی هۆلەوە بۆ عێراق بەردەوامە و ئەمڕۆ قۆناغی ٢٣ـی گواستنەوەی خێزانە عێراقییەكانی نیشتەجێی كامپی هۆل بۆ كامپی جەدعە لە باشووری موسڵ تەواوبوو، كە زیاتر لە ١٦٠ بنەماڵەی لەخۆگرتبوو.
میدیا عێراقییەکان ئاماژەیان بەوەداوە وەزارەتی كۆچ و كۆچبەرانی عێراق ١٦٠ خێزانی عێراقی لە كامپی هۆل گەڕاندەوە بۆ كامپی جەدعە لە موسڵ، كۆی گشتی ژمارەی ئەو هاوڵاتیانە ٦٠٠ كەس بووە، كە زۆرینەیان ژن و منداڵ بوون.
سەرچاوەکان ئاماژەیان بەوەشداوە پرۆسەی گواستنەوەكە بە هەماهەنگی هاوبەش ئەنجامدراوە، هەروەها كۆی ژمارەی ئەو خێزانانەی لە ماوەی قۆناغی ٢٣ گواستراونەتەوە گەیشتە نزیكەی سێ هەزار خێزان.
جەخت لەسەر بەردەوامی گەڕاندنەوەی بنەماڵەکان کراوەتەوە و گوتراوە: " پرۆسەی گەڕاندنەوەی خێزانەكان بە پێی پلانێك بەردەوامە، كە پشكنینی ئەمنی و گواستنەوەیان لە خۆدەگرێت، لەگەڵ بەشداریكردنیان لە پرۆگرامەكانی یەكخستنی كۆمەڵگەدا، هاوكات ئامادەكارییەكان بۆ گواستنەوەی وەجبەیەكی نوێ لە هەفتەی داهاتوو بە هەماهەنگی لەگەڵ ئیدارەی كامپی هۆل بەردەوامە."
