دەوڵەتی ئێران لە ورمێ کوردێکی کوشت
ڕاگەیاندرا هێزەکانی دەوڵەتی ئێران لە ناوچەی ورمێ ڕۆژهەڵاتی کوردستان هاوڵاتییەکی کوردی بە ناوی موحەمەد حسێن زادە کوشتووە.
کۆمەڵەی مافەکانی مرۆڤی کوردستان بڵاوی کردەوە، هاوڵاتییەکی کورد خەڵکی ورمێ بە تەقەی ڕاستەوخۆی هێزە چەکدارەکانی ئێران کوژرا، دەشڵێن هێزەکان بەبێ هۆشداریی پێشوەختە تەقەیان لە ئۆتۆمبێلی ئەو هاوڵاتییە کردووە.
کۆمەڵەی مافەکانی مرۆڤی کوردستان دەڵێت: "ڕۆژی شەمەی ڕابردوو هاوڵاتییەکی کورد بە ناوی موحەمەد حسێن زادە خەڵکی گوندی قشڵاقی تەرزیلووی سەر بە شاری ورمێ بە تەقەی ڕاستەوخۆی هێزە چەکدارەکانی ئێرانەوە کوژرا."
ئاماژەشی بەوەکردووە هێزەکانی دەوڵەتی ئێران بەبێ هۆشداریی پێشوەختە و بە گومانی "هەڵگرتنی کەلوپەلی قاچاخ" تەقەیان لە ئۆتۆمبێلی ئەو هاوڵاتییە کردووە و کراوەتە ئامانج.
