چالاکوانانی مانگرتووی مەخمور، لە کەسایەتی هاوسەرۆکانی ئەنجومەنی گەل، محەمەد تونج و ئاسیە یوکسەل-دا، هەموو شەهیدانی خۆبەڕێوبەریی دیموکراتییان بەبیرهێنایەوە.

چالاکیی مانگرتن بۆ ئازادیی ڕێبەر ئۆجالان و پشتیوانیی مانگرتن لەخواردنی زیندانیان لە زیندانەکانی دەوڵەتی تورک، لە کامپی پەنابەرانی شەهید ڕۆستەم جودی لە مەخمور، بە پێشەنگایەتی ژنان، لەڕۆژی ١٨ی مانگی ١٢ی ساڵی ٢٠٢٠ـەوە، دەستیپێکردووە و لە ٥٢ـەمین ڕۆژیدا بەردەوامە.

چالاکوانانی مانگرتوو، دوای دەقەیەک ڕێزگرتن بۆ یادی شەهیدان، بەبۆنەی پێنجەمین ساڵوەگەڕی کۆمەڵکوژیی ژێرزەمینەکەی جزیرەی باکوری کوردستان، ڕاگەیاندراوێکیان بڵاوکردەوە کە لەلایەن کاژین ئۆزەک خوێندرایەوە.

لە ڕاگەیەندراوەکەدا هاتووە: لەسەر ناوی چالاکوانانی گروپی ٢٦ـەمدا، بە بۆنەی پێنجەمین ساڵوەگەڕی شەهیدبوونی هاوسەرۆکانی ئەنجومەنی گەلی جزیرە، محەمەد تونج و ئاسیە یوکسەل، هەموو شەهیدانی بەرخۆدانی خۆبەڕێوبەریی دیموکراتی و بە گشتی شەهیدانی شۆرشی کوردستان بەبیردێنینەوە و بەژنی خۆمان لە بەرامبەریان نەوی دەکەین.

هەروەها هاتووە: بەرخۆدانی ٢١ ساڵەی بێوێنەی ڕێبەر ئاپۆ لە ئیمراڵی، ئەو داستانانەی کە گەریلاکانی ئازادی کوردستان لە جەنگی هەفتانیان و چیاکانی کوردستان خولقاندوویانە، چالاکیی مانگرتنی گیراوانی دۆزی پەکەکە و پاژک، هەروەها بەرخۆدانی گەلی کورد لە چوارپارچەی کوردستان و دەرەوەی وڵات، چۆکی فاشیستەکانی خستووەتە لەرزە و مۆراڵ و هیوایەکی گەورەی بۆ گەلانی ئازادیخواز دروستکردووە.

لە بەشیکی دیکە ئاماژە بە ناڕەزایی خوێندکارانی زانکۆی بۆغازچی تورکیا کراوە و پشتیوانیی خۆیان لەو ناڕەزایەتییە  دەربڕیوە و لە بەردەوامی هاتووە: زوڵم و گۆشەگیریی لە کەسایەتی عەبدوڵا ئۆجالان ڕێبەری گەلی کورد لەسەر گەلی کورد، گەلانی تورکیا و هەموو گەلانی بندەست دەکرێت، ئێمە ئەمڕۆ لە چوارچێوەی هەڵمەتی “کاتی ئازادییە” بۆ شکاندنی گۆشەگیریی و بۆ ئازادیی جەستەیی ڕێبەر ئاپۆ لە چالاکی داین، بەم بونەیەوە سڵاو لە مانگرتنی زیندانەکان و یۆنان دەکەین، بە بەرزکردنەوەی بەرخۆدان، لەگەڵ ڕێبەرمان بە ئازادی دەژین.

ف.ق