دژی زەوتکردنی ئیرادەی گەلی جولەمێرگ، لە ناوچەی ڕێگەی ئاوریشمی وان کۆبوونەوەی گەل ئەنجامدرا، هاوسەرۆکی گشتی دەم پارتی تولای حاتەم ئۆغۆللاری و هاوسەرۆکی دەبەپە کەسکین بایندەر بەشداری کۆبوونەوەکە بوون.

هاوسەرۆکی گشتی دەبەپە کەسکین بایندەر تیشکی خستەسەر بەرخۆدانی ٥ ڕۆژەی گەل دژی دەستبەراگرتنی ئیرادەی گەلی جولەمێرگ، گوتی: "مزگێنی ئاکەپە بۆ وڵاتەکە، تەنها شەڕ و دوژمنایەتییە. ئەردۆگان دوو ڕۆژ پێش ئێستە گوتی "ئەوەی لە جولەمێرگ ڕوویدا بەردەوام دەبێت". ئێمە تا کۆتایی دژی ستەم بەرخۆدان دەکەین و خاوەنداری لە ئیرادەمان دەکەین".

هاوسەرۆکی دەم پارتی تولای حاتەم ئۆغۆللاری ڕایگەیاند گەلی وان و گەلی کورد و گەلانی تورکیا ڕێگە بە زەوتکاران نادەن، دووپاتی کردەوە دەیانەوێت ئەوەی لە جولەمێرگ ڕوویدا لە شوێنی دیکەش ئەنجامی بدەن، دووپاتی کردەوە لە هەموو جێگەیەک دژی ئەم هەوڵە بەرخۆدان دەکەن و گوتی: "ئەمە تێکۆشانێکە دژی فاشیزم. لەم تێکۆشانەدا تەنها نین، چەندەها ڕۆشنبیر و دیموکراتی تورکیا، شۆڕشگێڕانی تورکیا، سۆسیالیست و سەندیکا و ڕێکخراوی جەماوەری دیموکراتیک و پارتی سیاسی پشتگیری ئێمەن".

حاتەم ئۆغۆللاری جەختی کردەوە سەردەمی دەسەڵاتی ئاکەپە کۆتایی هاتووە و پێکەوە دەفتەری ئاکەپە دادەخەن، گوتی: "دیسان لە قەڵای وانەوە بانگەواز دەکەم، وەرن پێکەوە بەرخۆدان مەزن بکەین، زەوتکاران بنێرینەوە و ڕێگەیان پێ نەدەین. وەرن پێکەوە یەکگرتن بەهێز بکەین. بڕوام وایە بە یەکگرتن و ڕێکخستنی جەماوەری لەگەڵ گەلەکەمان دەتوانین زەوتکەران بنێرینەوە و ڕێگەیان لێ بگرین".

پاشان جەماوەر بە درووشم و چەپڵە و هەلهەلە بەرەو بینای دەم پارتی ڕێپێوانیان کرد.