لەبەردەم شارەوانی خەلفەتی بەرخۆدان دەستی پێ کردووە و تادێت مەزنتر دەبت، پۆلیس ڕێگەی گەنجانی بەرەو شارەوانی داخست، گەنجان بە درووشمی "کوردستان دەبێتە گۆڕستانی فاشیزم" ناڕەزایەتییان بەرامبەر ئاستەنگەکان دەربڕی و هەوڵی شکاندنی بەربەستەکەیان دا. پۆلیس بە تۆما و گازی فرمێسکڕێژ و گولـلەی پلاستیکی هێرشیان کردە سەر گەل کە پەرلەمانتاران و هاوسەرۆکانی شارەوانیشی تێدابوو، گەنجان بە بەرد وەڵامی هێرشەکانیان دایەوە و لە کۆڵانەکان ئاگریان کردەوە، گۆرانی بەرخۆدانیان چڕی و درووشمی "بژی بەرخۆدانی خەلفەتی"یان بەرزکردەوە، جەختیان کردەوە خەلفەتی ڕادەست نابێت.

پاش هێرشی پۆلیس، جەماوەر بەرەو بینای دەم پارتی ڕێپێوانیان کرد و درووشمی "کوردستان دەبێتە گۆڕستانی فاشیزم" و "بە بەرخۆدان سەردەکەوین"یان بەرزکردەوە و کەسانی دەوروبەر بە چەپڵە و هەلهەلە پشتگیری چالاکییەکەیان کرد. ڕێپێوانەکە لەبەردەم بینای دەم پارتی کۆتایی هات.

پەرلەمانتارانی دەم پارتی و هاوسەرۆکانی شارەوانی شارەکە دژی قەیوم بۆ دیاریکردنی ڕێگەچارەیەک، کۆبوونەوەیان ئەنجامدا. گەل لە دەرەوە وەستاون.