کەجەکە ڕایگەیاند، دەوڵەتی تورک لە کۆنسێپتی قڕکردنی کوردان پشت بە خیانەت دەبەستێت، "تاکە ڕێگە بۆ لەناوبردنی ئەو کۆنسێپتەش وەستاندنی خیانەتە". داواشی لە هەمووان کرد کە لە ناوخۆ و دەرەوەی وڵات ڕوو لە گۆڕەپانەکان بکەن و بە توندی دژی خیانەت بوەستنەوە".
هاوسەرۆکایەتی دەستەی بەڕێوەبەرایەتی کەجەکە سەبارەت بە هێرشی چەکداری بۆ سەر نوێنەرایەتی باشووری کوردستانی کۆنگرەی نەتەوەیی کوردستان (کەنەکە) کە لە ئەنجامدا لە هەولێر دەنیز جەودەت بولبون شەهید بوو، ڕاگەیەندراوێکی بڵاوکردەوە.
کەجەکە ڕایگەیاندوە، "چیتر نە بە قسەی شەرمنانە، بەڵکو بە شێوەیەکی بەهێز پێویستە هەمووان ئاماژە بە ڕاستییەکان بکەن. ئێمە ناچارین بە خیانەت بڵێین خیانەت، ئەگەر بتوانین ئەمە بکەین، دەتوانین بڵێین خیانەت خیانەتە و هەڵوێست نیشان بدەین، پاشان دەتوانین بەر بە شکست و کارەساتە گەورەکان بگرین. بەو جۆرە یەکڕیزی و یەکێتی کورد پێکدەهێنین، لە دۆخێکی پێچەوانەدا ڕێگە بە کارەسات و خیانەتی گەورەتر دەدەین، ئەوەش دەبێتە گەورەترین زیان و خراپەکاری بەرامبەر دۆزی کورد و کوردستان".
دەقی ڕاگەیەندراوەکەی هاوسەرۆکایەتی دەستەی بەڕێوەبەرایەتی کەجەکە بۆ گەلی کورد و ڕای گشتی دیموکراتیک بەم شێوەیەیە:
"وەک ڕایگشتی هەستیان پێکردووە، دەوڵەتی تورک هێرشەکانی زیاتر کردووە، لەم دواییانەدا لە سلێمانی و هەولێر هێرش ئەنجامدرا، دوو ڕۆژ پێش ئێستا لە ڕۆژئاوا و شەنگال هێرش ئەنجامدرابوون. ئەو هێرشانە شەهیدیان لێکەوتەوە. لە لایەکی ترەوە دەوڵەت تورک بە شێوەیەکی بێ وەستان لەدژی بزوتنەوەکەمان و گەریلا هێرش ئەنجام دەدات. گەریلا لە دژی ئەو هێرشانەی دەوڵەتی تورک خۆڕاگری دەکات، لە کەسایەتی ئەوانەی لەو هێرشانەدا تیرۆرکراون و شەهید بوون، هەموو شەهیدانی شۆڕش و دیموکراسی بە ڕێز و پێزانینێکی گەورەوە یاد دەکەینەوە. دڵسۆزی و وەفاداریمان بە تێکۆشان و یادی شەهیدان دووپات دەکەینەوە، بەدڵنیاییەوە گەلی وڵاتپارێزی کوردستان بەهۆی هەموو ئەو کردەوانەوە لێپێجینەوە لە دوژمن و ئەو خیانەتکارانە دەکات کەلەگەڵ دوژمن کاردەکەن.
هێرشەکان نەک بە هێزی دوژمن بەڵکوو بە پشتیوانییەکانی خیانەت ئەنجام دەدرێن
بەداخەوە لە هەموو ئەو هێرشانەدا پەنجەی خیانەت بوونی هەیە. ئەو هێرشانە نەک بە هێزی دوژمن، بەڵکوو بە پشتیوانی خیانەتکاران ئەنجام دەدرێت. ئەو هێرشە خیانەتکارانەیە شەهیدیان لێدەکەوێتەوە، ئەوەش بەئازارە، بەڵام راستیە. پەیوەندی بارزانییەکان و دەوڵەتی تورک خیانەتێکی ئاشکرایە و ئەو هێرش و شەهیدبوونانە هەمووی بەهۆی ئەوەوەیە. دەبێت هەموو کەس ئەو راستیە ببینێت و قەبوڵی بکات. ئەگەر ئەو دۆخە زیاتر چاوپۆشی لێبکرێت و هەڵوێستی پێویست بەرامبەر نەگیرێتەبەر، ئەو کاتە وەک گەل ئێمە دەکەوێنە دۆخێکی بەئازارتر و خراپتر. ئەگەر هەڵوێستی پێویست بەرامبەر بە خیانەت نیشان نەدرێت، ئەو داوەی لەسەر خیانەت سازکراوە دەگاتە ئەنجام. کوردێک نییە کە نەزانێت ئەو داوە چییە. ئەو داوە پلانی دەوڵەتی تورکە بۆ کۆتاییهێنان بە کورد و کوردایەتی لە رێگەی کۆمەڵکوژی و جینۆسایدەوە. دەوڵەتی تورک و دەسەڵاتداری ئاکەپە-مەهەپە ئەو پلانە جێبەجێ دەکەن. سیاسەتی بنچینەیی دەوڵەتی تورک مەگەر ئەوە نییە؟ ئاشکرایە کە ئەوەیە. ئەوانەی لەگەڵیان دەجوڵێنەوە هاوکاری ئەو پلانەن. ئەوەش ئاشکرایە. هەربۆیە دەڵێین؛ سەرباری ئەوەی دەبینرێت کە پەیوەندی بارزانییەکان لەگەڵ دەوڵەتی تورک هاوکاری و خیانەتە، ئەو دۆخە بە بەرجستەیی باس ناکرێت و هەڵوێستی پێویست نیشان نادرێت. تائەم ساتە بە دڵنیاییەوە ئەوە نەکراوە. بەم جۆرە رێگری لەوەکراوە کە گەل هەڵوێست و ناڕەزایەتی بەهێز لە بەرامبەر خیانەت نیشان بدات.
پلانی دەوڵەتی تورک داگیرکردن و دەستبەسەرداگرتنی تەواوی باشووری کوردستانە
دوای ئەوەی هاکان فیدان سەردانی عێراق و باشووری کوردستانی کرد و دیداری ئەنجامدا، هێرشەکان زیاتر بوون. ئەو رووداوانەی لە رۆژانی رابردوودا لە هەرێمی برادۆست روودەدەن دەریدەخەن کە پلانی نوێ جێبەجێ دەکرێن و دەخوازرێت کە دەوڵەتی عێراقیش لەو پلانەدا بەشداری پێبکرێت. لە هەرێمی برادۆست هەوڵ دەدرێت بچنە ناو گۆڕەپانەکانی گەریلاوە، گوشار دەخرێتە سەر گەل کە ماڵ و حاڵی خۆیان بەجێبهێڵن. ئاشکرایە کە ئەمە ئامادەکارییە بۆ هێرش و بەشێکە لە پلانی داگیرکەری دەوڵەتی تورک. ئەوەی لە کەرکوکیش دەکرێت بەشێکە لەو پلانە. بەپێچەوانەی بانگەشەکانی بارزانیەکان ئەو هەوڵانە بۆ رزگارکردنی کەرکوک نییە، بەڵکوو لە پای وەرگرتنی پشکێک لە نەوتی کەرکوک، رادەستکردنیەتی بە دەوڵەتی تورک. ئەو پلانەی لەسەر کەرکوک جێبەجێکراوە پلانێکی دەوڵەتی تورکە. لەبەر ئەوە دەوڵەتی تورک بە چەند وتەی ناڕەزایەتی بچوک رووداوەکە پەردەپۆش دەکات. چونکە دەوڵەتی تورک خاوەن مامەڵەکردنێکی بەو جۆرە نییە کە بیەوێت کەرکوک وەک بەشێک لە کوردستان، کێشەکانی چارەسەر بکرێن. پلانی دەوڵەتی تورک بریتیە لە داگیرکردن و دەستبەسەرداگرتنی تەواوی باشووری کوردستان.
جگە لە چەند شار، کوردستان بەلای بارزانیەکانەوە کەرستەیەکە بۆ بازرگانی
بارزانی بە تەواوەتی لە سیاسەتەکانی دەوڵەتی تورکەوە تێوەگلاون. خۆی پێویست ناکات کە باس لە سیاسەتەکانی دەوڵەتی تورک و مامەڵەکردنیان بەرامبەر بە کوردان بکرێت. دەبێت ئیتر ئەو راستیەی بارزانیەکان لەلایەن هەموو کوردانەوە ببینرێت. بە وتنی ئەوەی بارزانی و پەدەکە کوردن، ئەو راستیە وەک پێویست نابینرێت. هەروەها دۆخێکی دەرونیش خوڵقێنراوە. ئەمە لەکاتێکدایە بارزانییەکان هیچ ئامانج و نیگەرانیەکیان بۆ کوردستان نییە. تەنیا چەند شاری کوردستان لە ژێر کۆنتڕۆڵی ئەواندا بێت، ئەو ناوچانە بەڕێوەببەن و لەپێناو خۆیان بەکاریبهێنن، ئەوەی تر بەلایانەوە گرنگ نییە. لەپێناو خواردنی خێر و بێری چەند شارێک سەرجەم ناوچەکانی دیکەی کوردستان بەلای ئەوانەوە ئامێر و کەرستەیەکی بازرگانی و سات و سەودایە. ئەگەر بەو جۆرە نەبوایە و ئەگەر دەر و مەراقیان کوردستان بوایە، ئایا هاکان فیدانیان لە باوەش دەگرت؟ هاکان فیدان بکوژە. هەموو رۆژێک لێکدانەوە بۆ ئەوە دەکات کە چۆن دەتوانێت باشتر کوردان بکوژێت. لەهەموو لایەک خوێنی کوردان دەڕێژێت. بارزانی پێشوازی لە بکوژێکی بەم جۆرە دەکات و لە ئامێزی دەگرێت، دەبنە هاودەمی. ئەو دۆخە بەتەنیا بەسە بۆ ئەوەی درک بە راستی بارزانیەکان بکرێت.
لە دژی خیانەت هەڵوێستی راست و پێویست نیشان نادرێت
ئێمە دەمانەوێت ئەوە بە جۆرێک دەستنیشان بکەین. ئەگەر تائێستا لە دژی خیانەت هەڵوێستێکی راست و پێویست نیشان بدرایە و رێگری لە ناڕەزایەتی گەل نەکرایە، دۆخەکە نەدەگەیشتە ئەم ئاستە، دوژمن نەیدەتوانی بکەوتایە ناو پلانێکی هێرشبەرانەی بەم جۆرە، ئەو هەموو ئازارە نەدەچێشران و زیانی گیانی نەدەهاتنە ئاراوە. هۆکاری ئەوەش بە دڵنیاییەوە ئەوەیە کە رۆشنبیران، نوسەران و هونەرمەندان کە هۆشمەندی، دەنگ و ویژدانی کۆمەڵگان، رێکخراوەکان و پارتی و دامەزراوەکان لە دژی خیانەت هەڵوێستی پێویستیان نیشان نەداوە. ئەو دۆخە بوێری بە خیانەت دەبەخشێت و دەبێتە مایەی ئەوەی خیانەت رۆژ لە دوای رۆژ قووڵتر ببێتەوە. ئەو راستیە دەبێت ببینرێت. دەبێت هەموو کەس پرسیار لە خۆیان بکەن، کە خیانەت ئەو ئازایەتیە لە کوێوە وەردەگرێت و بە دوای وەڵام بۆ ئەو پرسیارە بگەڕێن. ئەگەر ئەوە بە شێوەیەکی بێ شک و گومان بکرێت ئەو کاتە هەموو کەس ئەنجامێکی دەست دەکەوێت.
ناچارین بە خیانەت بڵێین خیانەت
لە هەولێر هێرش کرایە سەر نوسینگەی کەنەکە، لە ئەنجامیدا نوێنەری کەنەکە لە باشوور هەڤاڵ دەنیز جەودەت بولبون شەهید بوو. ئەو رووداوە زۆر واتادارە کە هێرش لە دژی کەنەکە ئەنجامدراوە. کەنەکە لەپێناو دەستەبەرکردنی یەکێتی نەتەوەیی کورداندا لە ناو هەوڵدانێکی گرنگدایە. لەماوەی رابردوودا بەو ئاراستەیە کاری زۆر گرنگی ئەنجامداوە. یەک لەو کارە گرنگانەشی سازکردنی کۆنفڕانسی سەد ساڵەی پەیمانی لۆزان بوو لە شاری لۆزان. لەو کۆنفڕانسەدا گفتوگۆی گرنگ ئەنجامدران، لەپێناو یەکێتی و یەکڕیزیی گەلی کورددا بڕیاری گرنگ دەرچوون. پەیمانی لۆزان بە واتای پارچەکردنی کوردستان و دەستپێکردنی نکۆڵی و سڕینەوەی گەلی کوردە. کۆمەڵکوژی کوردان لە رێگەی ئەو پەیمانەوە دەستیپێکرد. لە سەدەم ساڵەی ئەو پەیمانەدا لەو شارەی کە پەیمانەکەی تێدا واژۆ کرا کارێکی لەم جۆرە، دیاریکردنی ئەو بناغە سەرەکیانەی کە پەیمانی لۆزان لە جینۆساید و دوژمنایەتی کوردان پشتی پێدەبەستێت و دەستنیشانکردنی ئیرادەی دامەزراندنی یەکێتی کوردان لە دژی ئەوە، زۆر گرنگ بوو. بەڵام بارزانی بەشداری لەو کۆبوونەوەدا نەکرد. لەبەر ئەوەی بارزانیەکان هیچ مەراق و پەرۆشیەکیان بۆ یەکێتی کوردان نییە. بەپێچەوانەوە خاوەن هەڵسوکەوتێکی بەو جۆرەن کە لە سەر جینۆسایدی کوردان دەژین و دەیانەوێت ئەوە بەردەوام بێت. ئەگەر بەو جۆرە نەبوایە وەک هەموومان دڵی ئەوانیش بۆ یەکێتی کوردان لێیدەدا، بۆ ئەوەی ئەویش وەک هەموو ئێمەی لێبهاتایە و ئەویش بە هەوڵی بەم جۆرە دڵخۆش دەبوو. بەڵام دۆخی بارزانیەکان بەم جۆرە نییە. نەک هەر بە وتەی ئێمە، بەڵکوو کردەوەکانی نیشانی دەدات کە ئەوانە چین. تاکە شتێک کە دەیڵێین ئەوەیە کە دەبێت ئەمە ببینرێت. نەک بە وتەی شەرمنانە، بەڵکوو بە شێوەیەکی بەهێز دەبێت ئیتر هەموو کەس راستیەکە دەستنیشان بکات. ئێمە ناچارین بە خیانەت بڵێین خیانەت. ئەگەر بتوانین ئەمە بکەین، ئێمە بتوانین بە خیانەت بڵێین خیانەتە و هەڵوێست بەرامبەر نیشان بدەین، ئەو کاتە رێگری لە شکست و دۆڕاندن و کارەساتی گەورە دەکەین. بەم جۆرە دەتوانین یەکێتی کوردان جێبەجێ بکەین. لە دۆخێکی پێچەوانەدا رێگە لەبەردەم کارەسات و خیانەتی گەورەتر دەکرێتەوە. ئەوەش دەبێتە زیان و خراپەکاری گەورە بەرامبەر دۆزی کورد و کوردستان.
هێرشەکەی سەر فڕۆکەخانەکەش بە ئامانجی زیاتر بڵاوبوونەوەی میتە لە هەرێمی سۆران
سەبارەت بە هێرشەکەی سلێمانیش دەمانەوێت ئەوە بڵێین. لەبارەی ئەو هێرشەوە تائێستا زانیاری بەرفراوان و تەواوەتیمان لەلانییە. زانیاری ئەوە هاتووە کە هێرش کراوەتە سەر فڕۆکەخانەیەک و هێرشەکە شەهیدی لێکەوتووەتەوە. هێرشەکانی سەر سلێمانی بۆ چاوترسێنکردنی خەڵکی سلێمانییە، بۆ ئەوەی وەک ناوچەی بادینان دەوڵەتی تورک و میت لە هەرێمی سۆرانیش بڵاوببێتەوە، هەوڵدانێکە بۆ بەشداریپێکردنی یەنەکە لە پەیوەندی هاوکاریدا لەگەڵ دەوڵەتی تورک، وەک ئەوەی پەدەکە دەیکات. لەبەر ئەوەی خەڵکی وڵاتپارێز و نیشتمانپەروەری سلێمانی و هەرێمی سۆران تائێستا دەستبەرداری هەڵوێستی نیشتمانپەروەری نەبوون، هێرشێکی نوێ لە دژییان ئەنجامدراوە. ئەو هێرشە بە توندی شەرمەزار دەکەین. بڕوای تەواوەتیمان هەیە کە خەڵکی ناوچەی سۆران وسلێمانی درێژە بەو هەڵوێستە وڵاتپارێزیەیان دەدەن، بە هیچ جۆرێک گومانمان لەوە نییە. لە هێرشەکانی سەر سلێمانی و هەرێمی سۆران هەروەها پلانەکان لەوبارەوە دەتوانرێت درک بەوە بکرێت کە دەوڵەتی تورک لە ناو چ لێکدانەوەیەکدایە. لە دژی ئەو هێرشانە بەر لە هەموو شتێک دەبێت خەڵک لە هەرێمی سۆران و سلێمانی هەڵوێست بگرنەبەر.
ئێمە ئەو هێرشانە کە دەوڵەتی تورک لە سەر دەستی خائینان ئەنجامیان دەدات بە توندی شەرمەزار دەکەین. دەبێت ئیتر هەموو کەس لە بەرامبەر خیانەت هەڵوێستی بەهێز و بەرجستە نیشان بدەن. دەوڵەتی تورک لە سیاسەت و کۆنسێپتی جینۆسایدی کورداندا پشت بە خیانەت دەبەستێت و بەم جۆرە بەڕێوەی دەبات. ئیتر ئەمە بەڕوونی دەبینرێت. تاکە ڕێگەی راگرتنی ئەم سیاسەتە و شکستپێهێنان بەم کۆنسێپتە رێگریکردن و بەرپێگرتنە بە خیانەت. ئەگەر رێکخراوە وڵاتپارێزە کوردییەکان، حزب، رۆشنبیر، نوسەر، هونەرمەند لە دژی خیانەت هەڵوێستی بەهێز و دیار بگرنەبەر و گەلی کوردستان هەڵوێستی بەهێز پەیڕەو بکات، ئەو کاتە بەر بە خیانەت دەگیرێت، سنووردار و بێکاریگەر دەکرێت. جارێکی دیکە بانگەوازی خۆمان دووبارە دەکەینەوە، لە وڵات و دەرەوەی وڵات گەلەکەمان بڕژێنە شەقامەکان، لە دژی خیانەت ناڕەزایەتی بەهێز نیشان بدەن، داوا لە حزب، رێکخراوە، دامەزراوە و کەسایەتیەکان دەکەین کە بۆ ئەو مەبەستە پێشەنگایەتی بکەن".
هـ. ب
