كۆمیته‌ی نه‌ورۆزی ئامه‌د: زیاتر له یه‌ك ملیۆن مرۆڤ دژی گۆشه‌گیری كۆبوونه‌وه
كۆمیته‌ی ئاماده‌كاری نه‌ورۆز له ئامه‌د رایگه‌یاند، كه وێڕای رێگریی و هێرشه‌كانیش زیاتر له یه‌ك ملیۆن مرۆڤ به‌شدارییان له نه‌ورۆزدا كرد و دژی گۆشه‌گیری وه‌ستانه‌وه.
كۆمیته‌ی ئاماده‌كاری نه‌ورۆزی ئامه‌د له باره‌ی نه‌ورۆزی به شكۆی ٢١ی ئادار له ئامه‌د له هۆتێل نیو گراند كۆنفرانسێكی رۆژنامه‌وانی ساز كرد. په‌رله‌مانتارانی هه‌ده‌په ده‌رسیم داغ و ره‌مزیه تۆسونیش به‌شدارییان له كۆبوونه‌وه‌كه‌دا كرد.
هاوسه‌رۆكی هه‌ده‌په‌ی شاره‌كه زه‌یاد جه‌یلان باسی له‌وه‌كرد، كه له نه‌ورۆزدا گه‌ل دیمه‌نێكی مێژوویی نیشانداوه و وتی، " به‌هۆی ئه‌م دیمه‌نه‌وه كه هیوا به كۆمه‌ڵگا ده‌به‌خشێت، ئێمه سپاسی گه‌لی ئامه‌د ده‌كه‌ین، كه چاوه‌ڕوانی هه‌ندێك كه‌سیان له‌باره برد كه به هیوای لاوازی نه‌ورۆز بوون. خاوه‌ندی ئه‌م نه‌ورۆزه گه‌له‌كه‌مانه".
جه‌یلان باسی له‌وه‌شكرد، "ده‌سه‌ڵاتداری ئاكه‌په-مه‌هه‌په سه‌ره‌تا رایگه‌یاند 'ئێمه مۆڵه‌تمان داوه'، دواتریش به قه‌ده‌غه‌كردن بیانگوتایه 'بڕوانن كه‌س خاوه‌نداری له هه‌ده‌په ناكات'. ده‌یانویست كه ٥٠-١٠٠ هه‌زار كه‌س به‌شدار بن. هێزێكی زۆریان له ئامه‌د كۆكرده‌وه. به ده‌یان هه‌زار پۆلیسیان له شه‌قامه‌كانی ئامه‌د جێگیر كرد. گه‌ل بۆ ئه‌وه‌ی خۆی بگه‌یه‌نێت گۆڕه‌پانی نه‌ورۆز ناچار كرا ل ٤-٥ خاڵی پشكنینه‌وه تێپه‌ڕێت. ئه‌وانه‌ی ویستیان بچنه گۆڕه‌پانه‌كه‌وه ٤-٥ كاتژمێر راگیران و دواتر توانیان خۆیان بگه‌یه‌ننه گۆڕه‌پانه‌كه. كاتێك پێداگرین و بڕیاردارییان بینی، هه‌ندێك ده‌رگایان به ته‌واوه‌تی داخست و چوونه ناو گۆڕه‌پانه‌كه‌یان قه‌ده‌غه كرد. په‌لاماری گه‌لیان دا. به گازی فرمێسك رێژ، به ئاوی سار، به دار له مرۆڤه‌كانیاندا. سه‌دان كه‌سیان ده‌ستگیركرد. سه‌رباری هه‌موو شتێكیش ناتوانن رێگری له ملیۆنێك مرۆڤ بگرن".
'گه‌ل نه‌چووه ژێر باری رێگری و گوشاره‌كان'
جه‌یلان ئاماژه به‌وه‌كرد، كه دۆخێكی به‌و جۆره له ده‌وروبه‌ری شانۆكه روویدا و وتی، "سه‌دان پۆلیسیان له ده‌وروبه‌ری شانۆكه جێگیر كرد بۆ ئه‌وه‌ی نه‌توانین كاره‌كانی خۆمان بكه‌ین. ئه‌وه دیمه‌نێكی گێره‌شێوێنی بوو. ئه‌گه‌ر ئێمه پشوودرێژ نه‌بووینایه مه‌ترسیه‌كی گه‌وره ده‌هاته ئاراوه. ئێمه قه‌رزارباری گه‌لی ئامه‌دین. هه‌م رێگریی، گوشار، ده‌ستگیركردن و گرتنیان ره‌تكرده‌وه و هه‌مو بواری گێره‌شێوێنیان له‌بار برد. ئه‌وانه‌ی ده‌یانگوت 'ئیراده‌ی گه‌لی ئامه‌د ده‌شكێنین'، گه‌لی ئامه‌د په‌یامی 'كه‌س ناتوانێت ئیراده‌ی گه‌لی ئامه‌د بشكێنێت'یان نارد. ئه‌م دیمه‌نه دیمه‌نێكی ئاسایی نییه. به گیانی ملكه‌چنه‌كردنی ملیۆنان ئامه‌دی ئه‌و دیمه‌نه ئافرێنرا".
جه‌یلان به‌بیری هێنایه‌وه ٦-٧ ساڵه گوشار له‌سه‌ر سیاسه‌تی دیموكراتیك هه‌یه و وتی، "هێرشیان كرده سه‌ر زمان، كولتور و هه‌بوونی ئێمه. به‌ڵام وه‌ك ئه‌نجام ئه‌و هێرشانه له نه‌ورۆز پوچه‌ڵ كرانه‌وه. كورد و دۆسته‌كانیان له‌م نه‌ورۆزه‌دا به ئیراده‌یه‌كی مه‌زن خاوه‌ندارییان له هیوای ئاشتی و سیاسه‌تی دیموكراتیك كرد".
جه‌یلان ئه‌وه‌شی به‌بیرهێنایه‌وه كه پارته‌كانی هاوپه‌یمانی كوردستانی له ١٠ی ئادار به نه‌خشه‌ڕێگه‌ی نه‌ورۆز داواكاریی هه‌ڵگرتنی گۆشه‌گیری و مسۆگه‌ركردنی ئازادی جه‌سته‌یی رێبه‌ری گه‌لی كورد عه‌بدوڵا ئۆجالان، ئازادی كورد، یه‌كێتی كورد، ئازادی په‌روه‌رده به زمانی كورد و ئازادكردنی زیندانیانی نه‌خۆشیان كردووه و ئه‌وه‌شی خسته‌ڕوو، كه له نه‌ورۆز خاوه‌نداری له‌و داواكارییانه كرا. جه‌یلان وتی، "ئه‌و داواكاریانه دروشمی نه‌ورۆز بوون. نه‌ورۆز بووه ده‌نگی ئاشتییه‌كی شكۆدار".
'په‌یامی گه‌ل له دژی گۆشه‌گیری'
هاوسه‌رۆكی هه‌ده‌په‌ی شاره‌كه گوڵیستان ئاتاسۆی ئاماژه‌ی به‌وه‌كرد، كه سه‌رباری هه‌موو جۆره گێره‌شێوێنیه‌كیش نه‌ورۆز پیرۆز كرا و خاوه‌نداری له نه‌خشه‌ڕێگاكه كرا: "گه‌له‌كه‌مان له هه‌موو شوێنێك به‌شدارییان له پیرۆزبایی كرد و خاوه‌ندارییان له نه‌خشه‌رێگاكه كرد. له دژی شه‌ڕ، سه‌لماندی كه ئیراده‌ی ئاشتی چه‌نده به‌هێزه. بووه نه‌ورۆزێك كه سیاسه‌تی گۆشه‌گیری له‌سه‌ر زیندانه‌كانی پوچه‌ڵ كرده‌وه. ئیراده‌یه‌كی به‌و جۆره له گۆڕه‌پانی نه‌ورۆزی ئامه‌د نیشان درا كه پێویسته گۆشه‌گیری له‌سه‌ر به‌ڕێز ئۆجالان هه‌ڵبگیرێت، زیندانیانی سیاسی هه‌موویان ئازاد بكرێن و پرسی كورد نه‌ك به شه‌ڕ، به‌ڵكوو به رێگای ئاشتیانه و دانوستان چاره‌سه‌ر بكرێت".
ئۆپراسیۆنی پاكتاوی سیاسی به‌ر له نه‌ورۆز
ئه‌ندامی ئه‌نجومه‌نی هه‌ده‌په پارێزه‌ر سه‌رحه‌د ئه‌ره‌ن باسی له‌وه‌كرد، كه رێگرییه‌كان به‌ر له نه‌ورۆز ده‌ستیان پێكرد. ئه‌ره‌ن ئه‌وه‌شی خسته‌ڕوو، كه له كاتی مه‌راسیمی پیرۆزباییدا زۆر كه‌س ده‌ستگیركران و وتی، " به‌ر له نه‌ورۆز ٢٤ ژن ده‌ستگیركران و ١١ كه‌سیان زیندانی كران. له‌باره‌ی ٣٦ سیاسه‌تمه‌دار و ژن كه له چالاكیدان بڕیاری گرتن دراوه و ١٧ كه‌سیان ده‌ستگیركراون. رۆژێك به‌ر له نه‌ورۆز به‌ر له‌وه‌ی ئه‌وان ببه‌ن بۆ دادگا، له‌سه‌ر بابه‌تێكی بچوك كه له دادگا وته‌یان لێوه‌رناگیرێت ده‌ستگیركران و دواتر ئازادیان كردن. به‌و جۆره نه‌یانهێشت ئه‌و هه‌ڤاڵانه‌مان به‌شداری له نه‌ورۆزدا بكه‌ن.
ئه‌ره‌ن باسی له رێگرییه‌كان له خاڵه‌كانی پشكنینی چوونه‌ناو گۆڕه‌پانی نه‌ورۆزی كرد و باسی له‌وه‌كرد، كه له‌به‌ر جلوبه‌رگی نه‌ته‌وه‌یی و ملپێچ پۆلیسه‌كان نه‌یانهێشت زۆر كه‌س بچنه ناو گۆڕه‌پانه‌كه‌وه و به‌و پاساوانه‌ش زۆر كه‌س ده‌ستگیركران. ئه‌ره‌ن ئه‌وه‌ی خسته‌ڕوو، كه ئه په‌رله‌مانتارانه‌ی له هه‌رێمی كوردستانی فیدراڵه‌وه هاتبوون، به‌هۆی ئه‌و جلانه‌ی رۆژانه له‌به‌ری ده‌كه‌ن، بۆ ماوه‌یه‌كی زۆر ئاسته‌نگیان بۆ دروست كرا. ئه‌ره‌ن باسی له كۆبوونه‌وه‌كانی به‌ر له نه‌ورۆزی به‌ڕێوه‌به‌رایه‌تی لقی ئاسایشی كرد.
ئه‌ره‌ن رایگه‌یاند، كه له‌و كۆبوونه‌وانه‌دا، بۆ ئه‌وه‌ی گه‌ل به ئاسانی بچنه ناو گۆڕه‌پانه‌كه‌وه گوایه خاڵه‌كانی پشكنین زیاد ده‌كران، به‌ڵام سه‌رنجی راكێشا بۆ سه‌ر ئه‌وه‌ی كه دۆخێكی پێچه‌وانه هاته ئاراوه. ئه‌ره‌ن به بیری هێنایه‌وه كه مرۆڤ له خاڵه‌كانی پشكنین كۆببوونه‌وه، پۆلیسه‌كان بواری گێره‌شێوێنیان ساز كرد، به دار و گاز ده‌ستوه‌ردانی مرۆڤه‌كانیان كرد و وتی، "سه‌رباری ئه‌وانه‌ش مرۆڤه‌كان ویستیان بچنه ناو گۆڕه‌پانی نه‌ورۆزه‌وه".
ئه‌ره‌ن باسی له‌وه‌كرد، كه به كرده‌وه نه‌ورۆز قه‌ده‌غه‌كراوه، له رۆژی نه‌ورۆزدا ٥٠٠ كه‌س ده‌ستگیركراون و ٨٠ كه‌سیان منداڵن. ئه‌ره‌ن ئاماژه‌ی به‌وه‌كرد، ئه‌وانه‌ی ده‌ستگیركراون له‌لایه‌ن پۆلیسه‌وه گواستراونه‌ته‌وه بۆ بنكه‌ی جیاجیا و بۆ ماوه‌ی چه‌ندین كاتژمێر له‌به‌ر سه‌رمادا راگیراون. ئه‌ره‌ن ئاشكرای كرد، كه له رۆژانی داهاتوودا راپۆرتێكی به‌رفراوان ئاماده ده‌كه‌ن. ئه‌ره‌ن سه‌رنجی راكێشا بۆ سه‌ر ئه‌وه‌ی هه‌ندێك منداڵ و ئێواره و هه‌ندێك منداڵیش به شه‌و دوای وه‌رگرتنی نمونه‌ی خوێن له‌لایه‌ن دادوه‌ره‌وه ئازاد كراون".
هـ . ب
