لەچوارچێوەی سەردانەكەیان بۆ هەولێر و كۆبوونەوەیان لەگەڵ لایەنە سیاسی و دەزگا ڕۆشنبیریی و ڕێكخراوە مەدەنییەكان، شاندی كەنەكە، سەردانی نوێنەرایەتیی پارتی دیموکراتی گەلان (هەدەپە)یان کرد و لەلایەن هاوسەرۆک و ئەندامانی نوێنەرایەتییەکەوە، پێشوازییان لێکرا.

دوای كۆبوونەوەیان، ناهیدە ئارمیش، هاوسەرۆكی نوێنەرایەتیی هەدەپە ‌و زەینەب موراد، هاوسەرۆكی كەنەكە، لێدوانێكی ڕۆژنامەوانییان دا.

ناهیدە ئارمیش، دوای بەخێرهێنان ‌و سوپاسی بۆ شاندەكەی كەنەكە، ڕایگەیاند: دۆخی نالەباری كوردستانیان بە گشتی، تاوتوێ‌ كردووە، بەتایبەت ئێستا كە لەپاڵ هێرش ‌و داگیركاریی دەوڵەتی توركدا، سیاسەتی قڕكردنی كورد لە هەرچوارپارچەی كوردستان بەڕێوەدەچێت.

هاوسەرۆكی هەدەپە، جەختیشی كردەوە لەوەی، بۆ تێپەڕاندنی ئەو دۆخە، ئەوەی پەیوەندیی بە پرسە نەتەوەییەكان ‌و ڕێككەوتنی ناوخۆییەوە هەبێت، هەدەپە درێغی لە جێبەجێكردنی ناكات.

زەینەب موراد، هاوسەرۆكی كەنەكە، لەبارەی كۆبوونەوەكەیانەوە ڕایگەیاند: دۆخی كوردستان، بەتایبەت باشووری كوردستان ‌و داگیركارییەكانی دەوڵەتی توركیان، تاوتوێ‌ كردووە.

زەینەب موراد، جەختیشی كردەوە لەوەی، ڕووبەڕووبوونەوەی ئەو قڕكردنە سیاسییە ‌و  هێرشە داگیركارییەكان، پەیوەندیی بە هەموانەوە هەیە ‌و ئەركی هەموانە.

ک-ش