لە راگەیەندراوەکەی دەستەی سەرۆکایەتی کۆنگرەی نەتەوەیی کوردستاندا هاتووە، "چەند ڕۆژێکە  لەبەرچاوی جیهان کارەساتێکی مرۆیی لە ناوچەی قەرەباخ (ئارتساخ) روودەدات. دوای ١٠٨ ساڵ جارێکی تر گەلی ئەرمەنی لەسەر خاکی خۆیان دەکوژرێن و ئاوارە دەکرێن. ئەوەی ئێستا لە ناوچەی قەرەباخدا روودەدات، پاکتاوکردنی نەژادی و درێژەدان بە جینۆسایدی ساڵی ١٩١٥ و هاوشێوەکانیەتی. ئەمڕۆ لە ناوچەی قەرەباخ، لە لایەن دەوڵەتی ئازەربایجان و دەوڵەتی تورکەوە کۆمەڵکوژی و پاکتاوێکی ئیتنیکی دەکرێت. بە پێی هەموو پێوەرە نێودەوڵەتییەکان ئەمە تاوانی دژی مرۆڤایەتیە. بەداخەوە ئەم کارەساتە لەبەر چاوی دونیا ڕوودەدات و دونیاش چاوی لێیەتی.

کەنەکە ئاماژەی بەوەشکردووە: "کاتێک سەیری دیمەنەکانی قەرەباخ دەکەین دیمەنەکانی شنگال و عەفرین و سەرێکانی دێنە بەرچاومان. ئەگەر ناویشیان جیاواز بێت، بەڵام تاوانباران وەک یەک بن، لەم هێرش و کۆمەڵکوژییانەدا دەوڵەتی تورک یان ڕاستەوخۆ هێرش دەکاتە سەریان یان لە پشت پەردەوە. دەوڵەتی تورک لە هەموو ئەو حاڵەتانەدا شکستی هێنا. ئەمڕۆ دەوڵەتی تورک دەیەوێت سنوورەکانی فراوانتر بکات و ببێتە دەسەڵاتێکی هەژموونیی گەورەتر لەسەر حسابی گەلی کورد و گەلی ئەرمەنستان و گەلی یۆنان. ئەوەی ئەمڕۆ لە قەرەباخ دەگوزەرێت، دەرئەنجامی ئەو عەقڵیەتەیە. ئەگەر ڕێگری لەم عەقڵیەتە نەکرێت، دیمەنەکانی ئەمڕۆی قەرەباخ لە زۆر شوێنی تردا چەنبارە دەبنەوە.

لە کۆتایی راگەیەندراوەکەدا هاتووە: ئێمە وەک کۆنگرەی نەتەوەیی کوردستان – کەنەکە، جارێکی دیکە پشتیوانی خۆمان بۆ گەلی ئەرمەنستان دەردەبڕین و بە توندی هێرشەکانی ئازەربایجان و دەوڵەتی تورک بۆسەر ئەرمەنستان شەرمەزار دەکەین.  داوا لە نەتەوەیەکگرتووەکان و هەموو ڕێکخراو و هێزە نێودەوڵەتییەکان دەکەین لەبەرامبەر ئەم کارەساتە بێدەنگ نەبن و ڕێگری لە هێرشەکان و پاکتاوی نەژادی بکەن".

هـ . ب