لەوبارەوە شانەى ئەمنى عێراق ڕاگەیەندراوێکى بڵاوکردەوە و لە ڕاگەیەندراوەکەدا هاتووە، یەكەكانی لیوای پیادەی ٥٠ بە پشتیوانی فڕۆكەكانیان چاودێری ٤ چەتەی داعشیان لە چیاى قەرەچوغ كردووە دوای ئەوەی پلانی هێرشکردنە سەریان دانرا توانرا لە هێرشێکدا دوو چەكداریان بكوژن.

 لە بەشێکى دیکەى ڕاگەیەندراوەکەدا باسلەوەکراوە، لەو هێرشەدا دوو لە چەتەی دیکە هەڵاتون و دوای چاودێریكردنیان چونەتە ناو ئەشكەوتێك، كە وەك مۆڵگە بەكاریان هێناوە.

لە کۆتایی راگەیەندراوەکەدا ئاماژەبەوەدراوە، دواى چونى ئەو چەتانە بۆ ناو ئەو ئەشکەوتەکە دەركەوتووە، کە چوار چەتەی دیکەى داعشى تێدایە و دواتر لە بۆردومانێكدا، كە بە هێلیكۆپتەر ئەنجامدراوە سەرجەمیان كوژراون و لەو دوو پرۆسەیەدا هێزەكانیان توانیویانە شەش چەتەی داعش لە قەرەچوغ بكوژن.

جێگەى ئاماژەیە، ماوەیەکە جموجوڵەکانى چەتەکانى داعش زیادیکردووە لەبەشێک لەناوچە جیاوازەکان هێرشدەکەنە سەر سوپاى عێراق و هێزەکانى پێشمەرگە و بەهۆی ئەو هێرشانەشەوە لەمانگى ڕابردوودا چەندین پێشمەرگە شەهید و برینداربوون ، بۆ ئەو مەبەستەش لە ئێستادا لە بەشێک لەناوچەکان ئۆپراسیۆنى سەربازى دژى جموجوڵەکانى ئەو چەتانە ئەنجام دەدرێت.

ف.ق