گەلی ئێزدی بە پێشەنگایەتی ئیدارەی خۆبەڕێوەبەری شەنگال دژی فەرمان هەموو ساڵێک چالاکی جیاواز ئەنجام دەدەن. بە پێشەنگایەتی شارەوانی گەلی شەنگال و یەکێتی گەنجانی ئێزیدخان لە ڕێڕەوی مرۆیی دیگور ڕێپێوانێکی جەماوەری ئەنجامدرا.

پاش گەیشتن بە حەوزی مەزن لە ڕێڕەوی نێوان شەنگال و ڕۆژئاوا، ئەندامی مەجلیسی خۆبەڕێوەبەری شەنگال هەیفا فەیسەڵ قسەی کرد و ڕایگەیاند لەسایەی ئەم ڕێڕەوەوە لە فەرمان ڕزگاربوون.

ئەندامی مەجلیسی بۆریک، حەیدەر کۆرکۆرکی ڕایگەیاند لێرە هەڤاڵان فریای گەلی شەنگال کەوتن و لە مردن ڕزگاریان کردن، ئەم حەوزە زۆر کەسی لە مردن ڕزگارکرد بۆیە بە ئاوێکی پیرۆزی دەزانین، گوتی کاتێک گەیشتینە ئێرە دایکم ٩٠ ساڵ تەمەنی بوو، هەڤاڵان کردیانە کۆڵی خۆیان و ڕزگاریان کرد.

ئەندامی مەجلیسی ژنان، نەعیم شەنگالی گوتی: "هەر کەس ئەم ڕێگەیە لەبیر بکات، خۆی لەبیر دەکات. دەبێت ئەم حەوزی ئاوە ببێتە سیمبولێکی ئێزیدخان".