ژمارەیەک سیاسەتمەدار و چالاکوانی گەرمیان دژی داگیرکارییەکانی دەوڵەتی تورک و هاوکارییەکانی پەدەکە، گردبوونەوەکیان ئەنجامدا و ڕایانگەیاند، داگیرکاریی و هەر نۆکەرایەتییەک ئیدانەدەکەین و داوای یەکدەنگی دەکەین دژی هێرش و داگیرکارییەکان.
ئێوارەی ئەمڕۆ لە شارۆچکەی کەلاری ناوەندی ئیدارەی گەرمیان، لەدژی هێرش و داگیرکاریی دەوڵەتی تورك بۆسەرهەرێمەکانی پاراستنی مەدیا و باشوری كوردستان، ژمارەیەک چالاکوانی مەدەنی و سیاسەتمەدار گردبوونەوەیەکی ناڕەزایەتییان ئەنجامدا.
حسێن عەزیز، لە وتەیەکدا لە گردبوونەوەکەدا وتی: هێرش و داگیرکارییەکانی تورکیا پێشێلکردنێکی ئاشکرای سەروەریی خاکی هەرێم و عێراقە و ئیدانەیدەکەین، هەروەها دژی هەر نۆکەرایەتی و چاوساغییەکی لایەنە کوردییەکانین بۆ داگیرکەران.
وتیشی: ڕێگای نادەین شکۆ و کەرامەتی هیچ تاکێکی کورد لە کەداربکرێت، داوای یەکڕیزیی و یەکدەنگی لە لایەنە سیاسییەکان و هاوڵاتییان دەکەین، داواکارین یەکدەنگییەک دروستبکرێت بۆ بەگژداچوونەوەی داگیرکارییەکانی دەوڵەتی تورک.
باسی لەوەسکرد: ئێمە دەزانین بەرژەوەندییەکی باڵای ئابوری لەنێوان لایەنێکی سیاسی دەسەڵاتداری کوردی و تورکیادا هەیە، هۆکاری هێرشەکان و پەردەپۆشکردنی داگیرکارییەکانیش هەر ئەوەیە.
ف.ق
