ئێوارەی دوێنێ لە ناوەندی دیالۆگ لە شاری کەرکوکی باشوری کورستان، گروپی شار بۆ مەعریفە هەستا بە ئامادەکردنی کۆڕێک لەژێر ناونیشانی 'سایکۆلۆژیای دەسەڵات و جەماوەر'، بابەتی کۆڕەکە لەلایەن دکتۆر سەمەد ئەحمەد دکتۆر لە بواری سایکۆلۆژیا و شارەزا لە بواری سیاسەت پێشکەش بە ئامادەبووانی کۆڕەکە کرا، کە تیدا باس لە چۆنیەتی بیرکردنەوەی عەقڵیەت و سایکۆلۆژیای دەسەڵاتە دیکتاتۆرییەکان بەرامبەر بە گەلەکانیان وە چۆنیەتی بەرنگاربوونەوەی عەقڵیەتی دەسەڵاتی دیکتاتۆری کرا.

ژمارەیەکی بەرچاو لە کەسایەتی رۆشنبیر، سیاسەتمەدار و چالاکوانی مەدەنی و سیاسی ئامادەی کۆڕەکە بوون.

لە کۆڕەکەدا دکتۆر سەمەد ئەحمەد تشكی خستەسەر عەقڵیەتی دیکتاتۆرەکان و ووتی: "دیکتاتۆرەکان لەپێناو مانەوەیان لەدەسەڵات بەردەوام خوێن دەڕێژن، چونکە ئەوەی گرنگە مانەوەیانە لەدەسەڵات بەهەر نرخێک بێت و بەردەوام خۆشیان بە چاکەکار و ڕزگارکەر دەبینن، دەسەڵاتە دیکتاتۆرەکان دەسەڵاتێکی فشۆڵ و ترسنۆکە بەرامبەر گەل، ئەوەی عەقڵ بێت لەلای سایکۆلۆژیای کەسی دەسەڵاتی دیکتاتۆردا نیە، هەروەها دەسەڵات حەز ناکات خەڵکی هۆشیاربێت چونکە ناتوانێت خۆی بگرێت لەبەرامبەر جەماوەری هۆشیار، بۆیە دەسەڵاتی دیکتاتۆر لەهەر شت زیاتر دژایەتی هۆشیاری دەکات وە بەهەموو هەوڵی خۆی هەوڵدەدات میلەتەکەی ناهۆشیاربن، هۆشیاری مەترسیدارە بۆ دەسەڵات".

سەبارەت بە ناوەڕۆکی کۆڕەکە دکتۆر سەمەد ئەحمەد، بۆ ئاژانسی هەواڵی فورات (ANF) بەم شێوەیە دوا: "لەم کۆڕەدا هەوڵمدا لە ڕووی لایەنی سیاسی، کۆمەڵایەتی و سایکۆلۆژی قسەبکەین، هەردوو چەمکی دەسەڵات و جەماوەر مەتوربەی لایەنی سیاسی و دەرون ناسییە، من لێرەدا هەوڵمدا بە تێڕوانینێکی سایکۆلۆژیانە لەسەر ماهیەت و چیەتی دەسەڵات قسەبکەم، دەسەڵات چەمێکی دیرینە کەم بیرمەند و فەیلەسوف هەن لە تێزەکانیان قسەیان لەسەری نەکردبێ، هەوڵمانداوە شرۆڤەی تیروانینە جیاوازەکان بکەین سەبارەت بە دەسەڵات".

هەروەها دکتۆر سەمەد ئەحمەد ووتیشی: "بەشی دووەمی کۆڕەکەش باسمان لە سایکۆلۆژیای جەماوەر کرد کە بەشێکە لە سایکۆلۆژیای سیاسی و سایکۆلۆژیای کۆمەڵایەتی کە چۆن دەسەڵات لە جەماوەر دەترسێت و هەوڵی ناهۆشیاربوونی جەماوەر دەدات".

ژ.ت