کاتژمێر ٤:٣٠ی ئێوارەی دوێنێ چوارشەممە بەرواری ٣٠/٦/٢٠٢١ لە بارەگای کەرکوکی ڕێکخراوی ژنانی ئازادیخوازی کوردستان (ڕەژاک) لە گەڕەکی ڕەحیماوای شارەکە بە بۆنەی ٢٥هەمین ساڵیادی چالاکیی گیانفیدایی زەینەب کناجی ناسراو بە هەڤاڵ (زیلان)  مەراسیمێكی یادکردنەوە بەڕێوەچوو.

سەرەتای مەراسێمەكە بە خۆلەكێك ڕاوەستان بۆ گیانی پاکی شەهیدانی رێگای ئازادی و دیموكراسی دەستیپێكرد و پاش بەخێرهاتنی بەشداربووانی مەراسیمەكە سازان فەرهاد ئەندامی ئەنجومەنی ژنانی ئازادیخوازی کوردستان (ڕەژاک) سەبارەت بە كەسایەتی شەهید (زیلان) بۆ ئامادەبووانی مەراسیمەکە ووتی: "چالاكییەكەی شەهید زیلان، لەكاتێكدا پێكهات كە هەموو دونیا لەهەوڵی ئەوەدا بوون  بزووتنەوەی رزگاریخوازی گەلەكەمان بە پێشەنگایەتی پەكەكە لەناوبەرن و بۆ ئەوەش دەستیان بەپیلانگێڕییەكی هەرێمی و نێودەوڵەتی كردبوو، هەر بۆیە شەهید زیلان لەوكاتەدا هەستی بە مەترسی پیلانگێڕییەكە كرد و بەگیانی خۆی، وڵامی پیلانگێڕانی سەر گەلەكەمان و بزووتنەوەكەی دایەوە."

هەروەها سەبارەت بە كەسایەتی شەهید زیلان سازان فەرهەد ووتیشی: "هەرچەندە شەهید زیلان، نەچووە لای رێبەر ئاپۆش، بەڵام، یەكێك لە كادیرە هەرە بەتواناكانی مەكتەبی ئاپۆیزم بوو، فەلسەفە و ژیان و كرداری بزووتنەوەی رزگاریخوازی لە كەسایەتیی خۆیدا کۆکردبووەوە، بەهەموو شێوەیەك كەسایەتییەكی فیدایی بوو، لەمێژووی تێكۆشانی گەلەكەماندا، ژنی كورد، هەمیشە، توانیوویانە لە قۆناخە هەستیارەكانی مێژوودا، رۆڵی بەكاریگەر لەئەستۆ بگرن، شەهید زیلانیش، نەریتی بەرخۆدانی لەیلا قاسم و هەزاران شۆڕەسواری تێكۆشانی رزگاریخوازی گەل و نیشتمان بوو."

پاشان سازان فەرهاد نامەی شەهید زیلانی بۆ ئامادەبووانی مەراسیمەکە خوێندەوە کە تیدا هاتبوو:-

بۆ گەلی وڵاتپارێزی كوردستان و ڕای گشتیی شۆڕشگێڕ

 لەمێژووی هەر گەلێكدا ڕووداوی گرنگ و قۆناغی وەرچەرخانی مێژوویی وا هەن كە چارەنووسی گەلانیان گۆڕیوە، وەكو شۆڕشی بورژوای فەڕەنسی، شۆڕشی بەلشەفیكی ڕووسی و دەركەوتنی ئیسلام، ئەم شۆڕشانە هەروەكو چۆن كاریگەری گەورەیان كردووەتە سەر مێژوو، بەهەمان شێوە چارەنووسی مرۆڤایەتیان دەستنیشان و ئاڕاستەش كردووە. لە دیرۆكی گەلاندا زۆر ڕێبەر و سەرۆكایەتی دەركەوتوون كە جێی دەستیان دیارە، نمونەی ئەوانەش (ئەسكەندەری گەورە، لینین، حەزرەتی محەمەد) ئەم كەسایەتییانە هەروەكو چۆن لەبواری كردارییەوە ببوونە ڕێبەری گەلەكانیان، ئەوا لە هەمانكاتدا توانیان ببنە ڕێبەری مرۆڤایەتیش.

كە سەرنجی مێژووی كورد دەدەین ئەوە لامان ڕوون دەبێتەوە؛ سەرباری ئەوەى چەندە مێژووی كورد بەخراپی و بەچەوتی نوسراوە و بەرەو هەڵدێر براوە، بەڵام لە هەردوو قۆناغی كۆمۆنەی سەرەتایی و كۆیلەداریدا، گەلی كورد ڕۆڵ و پێگەی خۆی هەبووە و دوای ئەوەی كە كورد دەكەونە ژێر كاریگەری پارس، ئیتر كوردان ئازادی لەدەستدەدەن و دوای ئەمە كوردان نەیان توانیوە خۆیان لەژێردەستی ڕزگاربكەن و ببنە خاوەن ئیرادە. گەلی كورد بەهەزاران ساڵە لەژێردەستی نەتەوە سەردەستەكان چەوسێنراوەتەوە و كوردستانیش بەدرێژایی مێژوو ببووە گۆڕەپانی شەڕ و پێكدادانی هێزە ناكۆك و دژبەرەكان، كەم تا زۆر گەلانی تر بەپێی هەل و دەرفەتی لەبار قۆناغەكانی پێشكەوتن ژیاون، بەڵام مێژووی گەلی كورد زۆر لە دوورەوە چاودێری كراوە. كۆمەڵگای كوردستان لەبواری پێشكەوتنی جڤاكییەوە لە ئاستێكی زۆرنزمدا ماوەتەوە. گەلی كورد زۆرجار لەپێناوی ئازادی وڵاتەكەیدا ڕاپەڕیوە. لەبەر نەبوونی سەرۆكایەتییەك، كە بتوانێت سەركەوتن دەستەبەربكات و خیانەتی ناوخۆیی و نەبوونی ڕێكخستن ڕاپەڕینە كوردییەكان تووشی شكست بوون. لە مێژووی نزیكدا تێكشكاندن و پووچەڵكردنەوەی سەرهەڵدانەكانی شێخ سەعید (1925) و سەرهەڵدانی دەرسیم (1937-1938) نموونەی هەرە بەرچاون. گەلەكەمان نەك هەر وڵاتەكەی، بەڵكو هەموو هەستی نەتەوەیی و زمان، دڵ، مێشكی لێ زەوت كراوە و بێ هیچ شتێك ماوەتەوە و ئەو واقیعە نالەبارەشی پەسند كردووە. داگیركەرانی كوردستان سیاسەتی (پەرتكە و زاڵبە)یان لەكوردستاندا بەڕێوەبردووە، ئەم سیاسەتە قێزەونەشیان ئاوێتەی شەڕی تایبەتی كردووە و زۆر خراپ لە بەرامبەری گەلەكەمان بەڕێوەیان بردووە."كوشتنی سپی" كە بریتییە لە توانەوەی نەتەوەیی و پاكتاوكردن بەسەر گەلی كورددا سەپاندووە. بەدرێژایی مێژووی كورد بەرخۆدان و خیانەت لەگەڵ یەكتردا ژیاون، خیانەتی ناوخۆیی بە بەردەوامی بووەتە تارمایی و پەڵەیەكی رەش بەسەر بەرخۆدانەكانەوە و بەزۆریش ئەنجام گیربووە لە تێكبردنی بەرخۆدان و سەرهەڵدانەكان.

بەڵام بەرەو هەڵدێر بردن و ئاڕاستەگرتنی مێژووی كورد لە (27 - 11 - 1978)دا بە دامەزراندنی پەکەکە ڕاوەستێنرا، پێشی ئەم بەروارە مرۆڤ لەكوردستاندا نەهێڵدرا. بەهەزاران مرۆڤی كورد بەكۆمەڵكوژی دەربازكران و لە ڕێگەی ئەنجامدانی تاوانی بكەری نادیارەوە و چالاكیی كۆنترگەریلاوە (دژە گەریلا) خەڵكێكی زۆر لەكوردستاندا كوژران. بەشێكیان پاكتاو كرد و بەشەكەی دیكەشیان لە بارێكی دەروونیی مردوو ئاسادا هێشتبووەوە، دەزگای جۆراوجۆریان بۆ ئەشكەنجەدانی كوردان ئاواكرد و ئەوانەشی بەساغی دەبرانە ئەو شوێنانە بەمردوویی دەردەخران. وەكو كورد قوربانیەكی زۆر و لە ڕادە بەدەرماندا.

ئەم ڕۆژانە شەڕێكی توند لە كوردستاندا لەئارادایە پارتیمان پەکەکە لە بەرامبەر هێرشی سەرتاسەری دوژمنە. ڕۆژ لە دوای ڕۆژ لەناو پێشكەوتن دایە و بەبەردەوامی لە گەورەبوون و بەهێزبووندایە و بەكاریگەرتر و بەعەزیمەت ترەوە گورز لە دوژمن دەدات و سەركەوتن نزیكدەكاتەوە. لەبەر ئەوەش بوونی هێزەكانی گەریلامان دوژمنی تووشی نەزیفی گیانی و ماددی كردووە. بەرەكەمان بەرەى رزگاریى نەتەوەیى کوردستان (ئەڕنەکە - ERNK) بەرفراوان بووە و خۆی گەیاندووەتە هەر چوار لای دونیا و گەلەكەمان لەناوخۆیدا ڕێكدەخات و سیاسەتی شەڕی تایبەتی توركیا ڕیسوا دەكات و بەدونیای دەناسێنێت. ڕۆژ لە دوای ڕۆژ مرۆڤی كوردستان جێگای خۆی لە ناو ڕیزەكانی شۆڕش و لەشەڕدا دەگرن، هاوكات لەگەڵ راگەیاندنی پەرلەمانى کوردستان لە دەروەى وڵات (پەکەدەوە - PKDW) و ئاواكردنی دەزگا نەتەوەییەكاندا پارتیمان هەنگاو بە هەنگاو بەرەو دەسەڵات بوونی گەل ئاراستەی گرتووە. بێگومان لەم شەڕەدا قوربانی زۆرمان بەخشی، لەبەر ئەوەی لەبەرامبەر هێزە دڕندەكانی دەوڵەتی توركیا شەڕدەكەین كە هێزە ئیمپریالیستەكان پاڵپشتی و هاوكاری دەكەن. بەڵام یەكەم جارە لە مێژوودا هێندە گەلی كورد بەهێز دەبێت و ئاستی وڵاتپارێزیی بەرزدەبێتەوە و دەبێتە نەتەوە و نزیكی ئازادی بووەتەوە، یەكەمجارە هێندە دەبینە خاوەنی كەرامەت و بەشانازییەوە دەڕوانینە ڕووی مرۆڤایەتی. ئەمەش لەبەر ئەوەی ئیتر لەپێناوی ئازادیدا شەڕدەكەین و ئەو شەڕەشمان بووەتە سیمبوڵی ئەفسانەیی جوانی و بەرخۆدان. بەو شێوەیەش كردوومانەتە موڵكی سەرتاپایی مرۆڤایەتی، بێگومان ئەمەش لە بەرخۆوە نەهاتۆتەدی، بەڵكو دەرئەنجامی بەرخۆدانی هەڤاڵانی وەكو (مەزڵوم، كەمال، خەیری، فەرهاد، بێریڤان، بێریتان، رووناهی)یە.

 بۆیە پێویستە خاوەن لەو نەریتە بەرخۆدانییە دەربكەوین، كە ئەو هەڤاڵانە دەستیان پێكردووە و هەتا دواهەناسە و دڵۆپە خوێنیان بەردەوامبوون لەسەری. وەكو پەیوەستبوون بەسەرۆك ئاپۆ، پارتیمان پەکەکە، شەهیدانی شۆڕش و بەرخۆدانی زیندانەكان و گەریلایانی سەر چیا و پەیوەستبوونم بە گەل و وڵاتەكەمەوە ئەم چالاكییە گیانبازییە ئەنجام دەدەم، بەو ورە و مۆراڵەی كە لە گەلەكەم وەرم گرتووە، بە جەسارەتەوە هێرش دەكەمە سەر دوژمن.

ئێمە لە هەركەس زیاتر ئاشتیخوازین و بڕوامان بەبرایەتیی گەلانە و مرۆڤ دۆست و سروشت دۆستین و لەهەر كەسی تر زیاتر پەیوەستین بە ژیان و جوانییەوە، ئەم حەز و خۆشەویستییەی كە هەمانە ناچارمان دەكات بۆ شەڕ و تێكۆشان. حەز لە مردن و كوشتن ناكەین، بەڵام بۆ ئەوەی بە ئازادی بگەین هیچ بژارێكی ترمان لە بەردەستدا نەماوە. تاوانباری هەرە گەورەی ئەم شەڕە ئیمپریالیزم و دەوڵەتی توركیای بەكرێگیراویانە و بێدەنگبوون لە بەرامبەر ئەمەدا گەورەترین تاوانە.

 بانگەوازی لە هەموو مرۆڤایەتی دەكەم:

ئەگەر ناتانەوێت ببنە هاوبەشی ئەو تاوانانەی كە دەرهەق بە مرۆڤایەتی لە كوردستاندا ئەنجام دەدرێن، ئەوا دەبێت پشتگیری و هاوكاریی گەلی كورد بكەن، دەبێت ئەو شتەی كە ئیمپریالیزم لە مێشك و دڵمان دروستی كردووە، بیسڕینەوە و گوێڕایەڵی بانگەوازییەكانی ئازادیی گەلێك بین، کە لە بانگەشەی پەیامی برایەتی، بەها و پیرۆزییەكانی مرۆڤایەتی و دۆستایەتی هەیە.

  بۆ گەلە وڵاتپارێزەكەم:

هەوڵدەدەم بەم چالاكییە ببمە هیوای ئێوە، بۆ ئازادی ئایندەتان، ئێمە بەهەزاران كوڕ و كچی ئێوە لەچیاكاندا تێكۆشان دەكەین، نەك جارێ بەهەزاران جار ئامادەین گیانمان فیدا بكەین. ئەمڕۆ شەڕی ئازادیمان لە ئاستێكی هەرە دژواردایە و دەبێت ئێوەش خۆتان یەكلایی بكەنەوە، شەڕەكەمان شەڕی گەلە. بۆیە دەبێت پێداویستییەكانی شەڕی گەل دەستەبەربكەین، وەكو دەڵێن "داری ئازادی بەخوێن ئاودەدرێت" پێویستە بەهەرزانی دەستەبەرداری ئازادی نەبن، دەبێت بەباشی دەرك بەو ڕاستیانە بكەن، كە وڵاتەكەمان زۆر بەنرخە، هەر لەبەر ئەمەیە دوژمن هێندە سوورە لە سەر مانەوە و دەستبەرداری نیشتیمانەكەمان نابێت، باشە بۆچی ئێمەش سوور نەبین؟ جودا لە گیانمان شتێكی ترمان نیە تا لە دەستی بدەین. پێویستە بژارمان مردنێكی بەنرخ و بەكەرامەت بێت، نەك ژیانێكی بێ كەرامەت و دابڕاو لە بەها و پیرۆزییەكان، هەر وەكو چۆن تا ئێستا گەل خاوەندارێتیی لە میراسی بەرخۆدانی پەکەکە دەكات و قوربانیی زۆری داوە، لەم قۆناغەشدا لە دەرئەنجامی ئەمە لە ئازادی نزیك بووەتەوە، ئەوا لەو بڕوایەدام بۆ ئەوەی ئازادی ئایندە بەدەستی خۆی ئاوابكات. گەلەكەمان ئامادەیە قوربانیی دیكەش بدات، بەمەش لەناو كۆمەڵگای مرۆڤایەتیدا بەڕوومەت و كەرامەتەوە جێگەی خۆی دەگرێت. بەم بۆنەیەشەوە سڵاویان لێدەكەم.

-  بمرێ ئیمپریالیزم و داگیركەری و هەموو شێوەكانی پاشڤەڕۆیەتی

 -  بژی ڕاستی بە ئەرتەشبوونی گەلەكەمان

- بژی سەرۆك ئاپۆ

زیلان (زەینەب كناجی)

 پاشان تەواوبوونی سیمینارەکە، سینەفیزیۆنێك لەسەر ژیان و خەباتی گەریلای ئەفسانەیی و فەرماندەی چالاکیی گیانبازی، شەهید (زەینەب کەناجی) ناسراو بە هەڤاڵ"زیلان" بۆ ئامادەبووان نمایش کرا.

پاش تەواو بوونی سینەفیزیۆنەکە ئامادەبووان بە دروشمەکانیی "شەهید نامرن" و "ژن، ژیان، ئازادی" کۆتایی بە مەراسیمەکە هات.

ژ.ت