ئەنجومەنی خۆبەڕێوەبەری دیموکراتیکی شەنگال (مەخەدەشە) لە راگەیەندراوێکدا جەژنی نەورۆزی لە گەلی کورد، کۆمەڵگای ئێزدی و هەموو ئازادی خوازان پیرۆز کرد.

راگەیەندراوەکە بەم جۆرەیە:

"ئێمە جەژنی نەورۆز لە تەواوی گەلانی ئاری، گەلانی ئازادیخواز و کۆمەڵگای ئێزدیمان پیرۆز دەکەین. هیوادارین کە ئەو جەژنە ببێتە مایەی ئاشتی، ئارامی وپێکەوەژیانی گەلان لە سەرتاسەری جیهان و شەنگال.

وەک دەزانرێت گەلەکەمان لە شەنگال بە جۆش و خرۆشێکی گەورەوە بە پێشەنگایەتی ئەنجومەنی خۆبەڕێوەبەری شەنگال نەورۆزی پیرۆز کرد و پەیامی شەنگالێکی ئارام و سەقامگیری دایە هەموو کەس.

بەڵام بەداخەوە لەبەر ئەو قوربانیانەی لەم ماوەیەی رابردوودا گەلەکەمان بەخشی، هەروەها بۆ رێزلێنان لە بومەلەرزەکەی باکور و رۆژئاوای کوردستان، ئێمە وەک خۆبەڕێوەبەری بڕیارماندا کە هیچ ئاهەنگێک ساز نەکەین، بەڵام ئەوە بەو واتایە نایات کە گەلەکەمان نەورۆز پیرۆز نەکەن. لە ئێوارەی نەورۆزدا گەلەکەمان لە زۆر شوێن ئاگریان کردەوە و نەورۆزیان پیرۆز کرد.

ئەمرۆ دەبینین کە زۆر پلانی دوژمن بەسەر شەنگالدا جێبەجێ دەکرێن و دەیانەوێت گەلی شەنگال لە راستی خۆیانەوە دووربخەنەوە. پێویستە گەلەکەمان لە رۆژانی نەورۆزدا خاوەنداری لە رۆژە پیرۆزەکانیان بکەن و رێگە نەدەن پلانەکانی دوژمن بگەنە ئەنجام.

چی دەبێت با ببێت بەرخودانمان لە پێناو شەنگالی خۆبەڕێوەبەر و ئازاد سەردەکەوێت و هەموو ساڵێک ئاگری نەورۆز لەسەر خاکی پیرۆز بە گیانی بەرخودانی گەریلا لە چیا ئازادەکان بە گوڕتر دەکەین و کولتوری هەزاران ساڵەمان دەپارێزین".

هـ . ب