لە ماوەی ڕابردوو لە چاوپێکەوتنێکدا کەماڵ کەرکوکی ئەندامی سەرکردایەتی پارتی دیموکراتی کوردستان (پەدەکە)  باسی کارەساتی ١٩٧٨هەکاری دەکات، کە لەو کارەساتە پەدەکە ٨٠٠ پێشمەرگەی یەكێتی نیشتیمانی کوردستان(یەنەکە) کۆمەڵکوژ کرد کە لە ناوچەی قەندیلەوە بەڕێکەوتبوون بۆ ناوچەی برادۆست بۆ ئەوەی لەوێشەوە بچن لە سوریا چەک بێنن بۆ هێزەکانیان و بارەگایەکیش لە بادینان دابنێن.

 کەماڵ کەرکوکی ڕووداوەکە بەشێوەیکی تر کە دەکەوێتە بەرژەوەندی پەدەکە دەگیرێتەوە و دەڵێت:"  ئامانجی هاتنی هێزەکەی یەكێتی بە هاوکاری ئێران و عێراق، تورکیا هاتبوون بۆ لە ناوبردنی قیادە مۆقەتەوە، بۆیە ئێمە هێرشمان کردۆتە سەریان."

 لە وڵامی ئەو قسانەی کەماڵ کەرکوکی ملازم عومەر، کە لە کاتی کارەساتی هەکاری ئەندامی مەکتبی سەربازی یەنەکە بووە و یەكێک لەو فەرماندانەی یەكێتی کە لە ساڵی ١٩٧٨ سەرپەرشتی بەشێک لە هێزەکەی یەکێتی کردوە بۆ ناوچەی بادینان و برادۆست دەڵێت:" ساڵی ١٩٧٥دوای ڕێکەوتننامەی جەزائیر لە نێوان عێراق و ئێران، بەسەرپەرشتی (محەمەد ڕەزا شای ئێران و سەدام حسێن) و نسکۆی شۆڕشی ئەیلول کە خۆم پێشمەرگە بووم تێیدا، برادەرانی پارتی چوونە کەرەج، نزیک لە تارانی پایتەختی ئێران. تا ڕادەیەک برادەرانی پارتی پەیوەندیان لەگەڵ ئێران و عێراق و تورکیادا ئاسایی بوو. ساڵی ١٩٧٨ کە کارەساتی هەکاری ڕویدا، بەشێک لە برادەرانی پارتی لە کەرەج بوون و بەشێکیان بە ناوی قیادەی مۆقەتەوە لە شاخ بوون. هێشتا شای ئێران و سەدام لە حوکمدا بوون و لە سایەی ڕێکەوتننامەی جەزائیرەوە پەیوەندیان لەگەڵ پارتیدا باش بوو."

 'کەماڵ کەرکووکی بەبێ بەڵگە قسە دەکات'

لە بەشێکی تر لە قسەکانی مەلازم عومەر وڵامی ئەو تۆمەتانە دەداتەوە کە کەماڵ کەرکوکی خستۆیەتیە پاڵ شەهید فەرماندە عەلی عەسکەری و دەڵێت:" کاک (کەمال کەرکوکی) باسی نزیکی (شەهید عەلی عەسکەری و یەکێتی) دەکات لە حکومەتی عێراقەوە، بەبێ پیشاندانی هیچ بەڵگەیەک. چۆن دەکرێت هێزێک لە یەک کاتدا نزیک بوبێت لە عێراق و لە سوریاشەوە، لە کاتێکدا سەدام حسێن و حافز ئەسەد دوژمنی سەرسەختی یەکتر بوون.

لەو کاتەدا ئێمە تەنها لەگەڵ سوریا و لیبیا و هەندێک لە فەڵەستینیەکاندا نێوانمان باش بوو. بۆیە لە عێراق و ئێران و تورکیاش پەلاماردراین. چەند ساڵێک بەر لەوە (خاڵە شەهاب و شەهید جەعفەر و شەهید ئەنۆر زۆراب) لە ئێران گیران و تەسلیمی عێراق کرانەوە و لە سێدارە دران. لە کارەساتی هەکاریدا، ئێران و عێراق وەکو دەوڵەت لێیانداین، لە تورکیاش کۆمەڵێک هۆزی نزیک لە پارتیەوە لێیانداین. دواجار قیادەی مۆقەتە پەلاماریان داین و بە ئەسیری (کاک عەلی عەسکەری و دکتۆر خالید و کاک حسێن بابە شێخ)یان شەهید کرد.

 "کەماڵ کەرکوکی چەواشەکاری دەکات"

ئەو وڵامەی مەلازم لە کاتێکدایە کە ئەو بەرپرسەی یەنەکە زیاتر لە ٢٢ ساڵە وازی لە کاری سیاسی و حزبی هێناوەی خۆی بە دوور گرتوە لە هەموو لێدوان چالاکێکی سیاسی، بەڵام ئەو قسانەی کەماڵ کەرکووکی کە مەلازم عومەر بە چەواشەکاری مێژووی بە ناویان دەکات، وای لە ملازم عومەر کردوە کە بێتە جواب وڵامی کەماڵ کەرکوکی بداتەوە.

لە کارەساتی هەکاری چەکدارەکانی پەدەکە بە هاوکاری هەریەک لە تورکیا، عێراق، ئێران بە شێک لە عەشیرەتەکانی باکوری کوردستان هێرشیان کردوە پێشمەرگەکانی یەنەکە و لە ئەنجامدا ژمارێکی یەکجار زۆر لە پێشمەرگەکانی یەنەکە-یان کۆمەڵکوژ کرد لەناو ئەوانەش دوای ئەوەی هەریەک لە عەلی عەسکەری بەرپرسی مەکەتبی سەربازی یەنەکە، خالید سەعد ئەندامی مەکەتەبی سیاسی یەنەکە و حوسین بابە شێخ ئەندامی مەکتەبی سیاسی یەنەکە، لە دوای ئەوەی بە دیلی دەکەونە دەستی پارتی چەکدارەکانی قیادە مۆقەتە (پەدەکە) بە چەکی ئاربیجی شەهید کران.

هـ . ب