پارتو ئیسلامی کورڎسانی (پیک) ۋەڵۍ ھورچنیاکا پەرلەمانی و سەرۊکایەتیی کۊماری جە ١٤و ئایاری جە تورکیا و سەرنیشتوو کورڎسانی-نە بەیاننامېۋەش ۋەڵاکەرڎۊ. بەیاننامەکە بە نامۍ "حیکمەت سەربڵند"ی سەرۊک و "پیک"ی ۋەڵاکریانۊ و چنەشەنە باس جە ھورچنیەکاو ١٤و ئایاری چېرو فشارۍ قورسی سیاسینە کەرڎەن و ئەرەیاۋنانش، "چی ھورچنیەنە، پېسە ۋەڵتەری، دەسەڵاڎ دارۍ تورکیای هامپەیمانی کورڎا پېسە دوژمنی نیشانە مڎا و حۊڵ مڎا بە ھجومی ڕەگەزپەرستی و نەژاڎپەرستانە ئامانجە پیس و قېزەونەکاشا بەدەس بارا."

جە بەیاننامەکەو "پیک"ینە ئامان، ڕژێمو کۊماری تورکیای گرڎو ڕا سیاسییەکاش ۋەرودەمو گەلوو کورڎینە وستېنێرە و جە گرڎو مەنتیقە و مەیڎانەکانە جە دژوو گەلوو کورڎی سیاسەتو بڕیەیرە و گۊشەگیرکەرڎەی ڕاۋەبەرمکەرۊ.

جە ئەرەیاۋناکەنە ئاماژە پانەیچ کریان، "کەناڵەکۍ یاۋنەری و ۋیری و ڕامانی ئازاڎی و ژیای ئازاڎ-یشا وستېرە و جە گرڎو مەنتیقەکا و مەیڎانەکانە و جە گرڎ مەجالېۋەنە حەوڵو سەرکوتکەرڎەو ویست و ئیراڎەو گەلوو کورڎی مڎا. جە ڕاسینە ئا نوێنەرۍ، کە جە لایەن و گەلیۋە ھورچنیېنۍ ئیسە ئینۍ زینڎانەکانە و قەیومۍ شۊنەکېشانە نریېنێرە. ئەشۊ گەلوو کورڎی چی ھورچنیەنە بە ئەنەیاۋای جە یۊبیەی نەتەۋەیی و براڵانە جە دژو هامپەیمانیی ڕەگەزپەرسی و نەژاڎپەرسی ئاکەپە – مەهەپە (هامپەیمانیی جمهور)ی ھەرمانە بکەرا.

پیک ئەرەیاۋناش؛ هامپەیمانیی ئازاڎیی و دیموکراسیی گەلوو کورڎی جە دژوو هامپەیمانیی جمهوری بە یاگەگیرێۋە بەقوەت مزانمۍ. داوا ٧ خاڵییەکۍ هامپەیمانیی ئازاڎیی و دیموکراسیی کورڎی بە داواکەرڎەیۍ خېرا و گرنگی مزانمۍ و پەشتیوانیش ۋنە مکەرمۍ.

جە دمادمایی ئەرەیاۋناکەو پیک-ینە ئامان، "ئێمە قەناعەتما چانەن، هامپەیمانی ئازاڎیی و دیموکراسیی کورڎی، کە جە ھورچنیەکانە چېرو چەترەو پارتو سەوزی چەپینە جە دژوو هامپەیمانیی دژە کورڎی دیکتاتۊری – فاشیستینە بەشڎاری جە ھورچنیەکانە مکەرۊ، بە دڵنیایۊ گەلەکەیما بەقوەت مکەرۊ. پېسە پارتو ئیسلامی کورڎسانی (پیک) چی ھورچنیەنە پەشتیوانی جە هامپەیمانییە فراوانەکەو پارتو چەپی سەوزی مکەرمۍ، کە گرڎیما جە ۋێش گېرۊنە. ئێمە داوا جە ئەنڎاما پارتەکەیما مکەرمۍ، کە جە دژوو هامپەیمانیی ڕەگەزپەرسی ئاکەپە – مەهەپەی بلانۍ سەرو سنوقەکا و چی ھورچنیەنە دەنگ بە پارتو چەپی سەوزی بڎا."

ھ.ش