رێکخراوی ژنانی ئازادی کوردستان (رەژاک) پێنجەمین کۆنگرەی خۆی بە دروشمی "بە پەروەردە، رێکخستن و پاراستنی ژنان، ئازادیی تاک و سیستمی دیموکراتیکی گەل مسۆگەر دەکەین" بەڕێوەبرد.

کۆنگرەکە لە ٢٨ی ئایار لە هۆڵی لاهای کەرکوک بە بەشداری ٢٥٠ ئەندام لە کەرکوک، سلێمانی، هەولێر، مەخمور، موسڵ، شەنگال و دیالە بەڕێوەچوو.

دوای خولەکێک رێزگرتن، سۆما فەرهاد پەیامی کۆمیتەى ئامادەکاری کۆنگرەی خوێندەوە و نەجیبە عومەریش وتەى سەرەتای پێشکەشکرد و رایگەیاند، ئەو سیستمانەى نکۆڵی لە هەبوون و ناسنامەى ژنان دەکەن هەڵدەوەشێن و راشیگەیاند، "لەم چەند ساڵەی دوایدا ناڕەزایەتیی ژنان گەیشتووەتە بەرزترین ئاست و هەموو کەسیش سوودی لە تێکۆشانی ژنان وەرگرتووە". نەجیبە عومەر ئەوەشی راگەیاند، شۆڕشی رۆژئاوا پێشەنگایەتی بۆ شۆڕشی هەموو ژنانی جیهان دەکات.  

لە کۆنگرەکەدا پەیامی بزووتنەوەى ئازادیى ژنانى ئێزیدخان (تاژێ - TAJÊ) خوێندرایەوە و لە پەیامەکەدا ئاماژە بە رۆڵ و تێکۆشانی رەژاک کرا. لە پەیامەکەدا ئاماژە بەوەشکرا، خاوەنداریکردنی رەژاک لە ژنانی شەنگال هەرگیز لە بیر ناچێتەوە.

فادیلە تۆک ئەندامی ئەنجوومەنی عەشتار لە مەخمور سەرنجی خستە سەر سەختی و دژوارییەکانی ژنانی کورد و وتی، "سەرباری هەموو ئەو شتانەش، ئێمە شانسمان هەیە، چونکە خاوەنی بزووتنەوەیەک و رێبەرایەتیکی گەورەین". فادیلە تۆک باسی ئەوەیکرد، کە دەبێت ژنان خاوەنداری لە ناسنامەی خۆیان بکەن و پێشەنگایەتی بۆ دامەزراندنی کۆمەڵگەیەکی ئازاد و یەکسان بکەن.

لە بەڕێوەبردنی کۆنگرەکەدا ئانالیز و شیکارییەکانی عەبدوڵا ئۆجالان رێبەری گەلی کورد خوێندرایەوە و لەسەر کارەکانی رەژاک سینەفیزیۆنێک نمایش کرا. دوای ئەوەش راپۆرتی ٣ ساڵی کار و رێکخستن خوێندرایەوە و گفتوگۆی لەسەر کرا.

لە کۆنگرەکەدا پەیڕەو و پڕۆگرامی رەژاک خوێندرایەوە و پێشنیازی گۆڕانکاری بۆ کرا و لەو بارەیەوە گفتوگۆ کرا و لە ئەنجامدا خرایە دەنگدانەوە و گۆڕانکارییەکان پەسەند کران.

لە کۆتایی کۆنگرەکەدا ئەنجوومەنی گشتیی رەژاک، کە پێکهاتوە لە ٢١ کەس پەسەند کرا. چاوەڕێ دەکرێت ئەنجامنامەى کۆنگرەش لە چەند رۆژی داهاتودا بڵاوبکرێتەوە.

ژ.ت