لیوا یەحیا ڕەسوڵ، وتەبێژی فەرماندەی گشتیی ھێزە چەکدارەکانی عێراق ڕایگەیاند، ئەو فڕۆكە بێفڕۆكەوانەی ڕۆژی ١٨ی ئەیلول فڕۆكەخانەی كشتوكاڵی عەربەتی لە سلێمانی بۆردوومان كرد و بە ھۆیەوە ٣ ئەندامی دژە تیرۆر شەھید بوون، لە توركیاوە هاتووە.
لیوا یەحیا رەسوڵ، وتەبێژی فەرماندەی گشتی هێزە چەكدارەكانی عێراق لەبارەی ھێرشەکەی دوێنێ بۆسەر فڕۆكەخانەی كشتوكاڵی عەربەت، ڕاگەیەندراوێكی بڵاوكردەوە.
لە ڕاگەیەندراوەکەدا هاتووە "کاتژمێر ١٧:٠٠ ڕۆژی ١٨ی ئەیلول ٢٠٢٣فڕۆكەیەكی بێفڕۆكەوان لە سنووری توركیاوە هاتووەتە ناو خاكی عێراق و فڕۆكەخانەی كشتوكاڵی عەربەتی لە پارێزگای سلێمانی بۆردوومان كردووە و بەهۆیەوە سێ ئەندامی دژەتیرۆر شەهیدبوون و سێ ئەندامی دیکەش برینداربوون".
جەختیشیکردووەتەوە، ئەو دەستدرێژییە، پێشێلكردنی سەروەریی، ئاسایش و یەكپارچەیی خاكی عێراقە. پێشێلكاریی و هەڕەشەیە بۆ سەر ئاشتی و ئاسایش لە ناوچەكە و جیهان. ھاوکات پێشێلكردنی یاسا نێونەتەوەییەکان، بنەما و یاساکانی نەتەوە یەكگرتووەكانە.
ئاماژەی بەوەشکردووە، ئەم هێرشانە لەگەڵ بنەمای پەیوەندیی باشی دراوسێیەتی نێوان ھەر دوو وڵات یەکناگرن و ناگونجێن و هەڕەشەن بۆ سەر ھاوڵاتیانی عێراق. ڕاشیگەیاندووە، "عێراق مافی خۆیەتی كۆتایی بەم پێشێلكارییانە بهێنێت".
ژ.ن
