پارێزەر تاهیر ئەلچی ٢٨ی تشرینی دووەمی ٢٠١٥ لەکاتی ئەنجامدانی کۆنگرەیەکی رۆژنامەنووسی لەبەردەم منارەی (چوارلنگ)-ی ناوچەی سوری شاری ئامەدی باکوری کوردستان شەهیدکرا.

لە شەشەمین ساڵیادی شەهیدکردنی ئەلچیدا، پارێزەران بە جلی پارێزەریەوە لەبەردەم دادگای ئامەد کۆبونەوە و تاوەکو ئەو جێگەیەی ئەلچی لێی شەهیدکرا، ڕێپێوانیان ئەنجامدا.

تورکان ئەلچی هاوسەری تاهیر ئەلچی، ساڵحە ئایدەنیز هاوسەرۆکی دەبەپە، ئەبرو گونای گوتەبێژی هەدەپە، سەزگین تانرکولو پارلەمەنتەری جەهەپە و سەرۆکی سەندیکای پارێزەرانی ئەنقەرە، ئیزمیر، ئەدەنە، مێرسین، ئانتاڵیا، سینۆپ، ئایدن و ئامەد ئامادەی ڕێوڕەسمەکە بوون.

پارێزەران پانکارتی 'لەبیرت ناکەین'-یان بەرزکردەوە و دروشمی 'تاهیر ئەلچی نەمرە'-یان وتەوە.

دوای ڕێزگرتن، نیهاد ئەرەن سەرۆکی سەندیکای پارێزەرانی ئامەد قسەی کرد وتی، "هەرچەندە هەوڵ دەدرێت، تاوانەکە پەردەپۆش بکرێت، بەڵام هەموو هەوڵێکی خۆمان دەدەین کە رووداوەکە ئاشکرا بکرێت و بۆ ئەوەش ئێمە بەڵێن بە ڕای گشتی کوردستان و تورکیا دەدەین."

دواتر تورکان ئەلچی هاوسەری تاهیر ئەلچی قسەی کرد و وتی، "٦ ساڵە ئێمە داوای ئاشکراکردنی بکوژان و رووداوەکە دەکەین، بەڵام دەسەڵات کەڕە و وەک ئەوەی بۆ دیوارێکی چیمەنتۆ قسە بکەین وایە. تاوەکو ئێستاش دەنگی گولەکان لە گوێ ئێمەدایە."

ف.ق