یەرەکە رایگەیاند، کە لە هێرشی فڕۆکەی بێفڕۆکەوانی دەوڵەتی تورکی داگیرکەردا، کە لە ٢٨ی تەمووز لە هەرێمی پێنجوێنی سەر بە سلێمانی ئەنجامدرا، دوو گەریلا شەهیدبوون و سەرەخۆشی لە بنەماڵەی شەهیدان و گەلی کوردستان کرد.
ناوەندی راگەیاندنی یەکینەکانی پاراستنی رۆژهەڵاتی کوردستان (یەرەکە) ناسنامەی دوو گەریلای رۆژهەڵاتی کوردستانی ئاشکرا کرد کە لە ئەنجامی هێرشی ئاسمانی دەوڵەتی تورکی داگیرکەردا شەهیدبوون.
راگەیەندراوەکە بەم جۆرەیە:
"وەک دەزانرێت لەم ساڵانەی دواییدا دەوڵەتی تورکی قڕکەر و فاشیست، لە بەرامبەر گەلی کورد شەڕێکی بەرفراوانی جینۆسایدکردنی دەستپێکردووە و لە هەموو گۆڕەپانێکی کوردستاندا هێرش دەکاتە سەر پێشەنگان و وڵاتپارێزانی کورد. لە ئەنجامی ئەو هێرشانەدا هەم لە گەل و هەمیش لە شۆڕشگێڕانی کوردستان بە شێوەیەکی ناجوامێرانە شەهید دەکرێن.
لە چوارچێوەی ئەو هێرشانەدا کە بەر لە ئێستاش بۆ رای گشتیمان ئاشکرا کردبوو لە ٢٨ی تەمووزدا لە دەوروبەری چوارتای نزیک پێنجوێنی سلێمانی، فڕۆکەیەکی بێ فرۆکەوانی دەوڵەتی تورک، کاتێک هەڤاڵانمان لە سەر ئەرکی خۆیان بوون، هێرشی کردە سەر ئۆتۆمبێلێکمان. لە ئەنجامی ئەو هێرشەدا دوو هەڤاڵمان شەهیدبوون و دوو هەڤاڵیشمان برینداربوون. ئەو هەڤاڵانەمان کە شەهیدبوون شیلان زاگرۆس و زاگرۆس زرێبارن.
ناسنامەی هەردوو هەڤاڵە شەهیدەکانمان بەم جۆرەیە:
ناو و پاشناو: هەدیە گەردەنە
ناسناو: شیلان زاگرۆس
کات و شوێنی بەشداربوون: ٢٠٢٢/ بانە
کات و شوێنی شەهیدبوون: ٢٠٢٣/ چوارتا
*
ناو و پاشناو: ئامانج (رێکەوت) شەریفی
ناسناو: زاگرۆس زرێبار
کات و شوێنی بەشداربوون: ٢٠٢٢/ پێنجوێن
کات و شوێنی شەهیدبوون: ٢٠٢٣/ چوارتا
هەردوو هەڤاڵە شەهیدەکەمان لە قۆناغی بەشداربوونیان لە ناو ریزەکانی گەریلادا بە پێداگرییەکی گەورە و گیانبازییەکی زۆرەوە بەشداربوون. وەک گەنجانی کوردستان لەو قۆناغەدا ئەرک و بەرپرسیارێتی خۆیان گرتە ئەستۆ و بە تایبەتی لە کاتێکدا کە گەلی کورد لەپێناو ئازادی و هەبوونی خۆی بە ناو تێکۆشانێکی بێ وچاندا تێپەڕدەبێت، بۆ ئەوەی ببنە وەڵامدەرەوە و لە شۆڕشی ئازادیدا رۆڵیان هەبێت، بە رۆحی ئاپۆیی هەڵوێستی گەنجانەی خۆیان پەیڕەو کرد.
بە جۆش و خرۆش و ورەوە رەنگی بە ژیانی گەریلا بەخشی
شەهید شیلان زاگرۆس لە شاری بانە لە ناو هەرێم و بنەماڵەیەک بە کولتوری وڵاتپارێزی گەورەبوو. لە قۆناغی شۆڕشی 'ژن، ژیان، ئازادی' کە لە کوردستان و جیهان دەنگی دایەوە، وەک ژنێکی گەنجی کورد هەڵوێستی شۆڕشگێڕی گرتەبەر و بەشداری ریزەکانی گەریلای ئازادیی کوردستانی کرد. سەرباری تەمەنی گەنجی، وەک کەسێکی هاوسۆز، ژیر و لێهاتوو لە ژیان و خەباتی شۆڕشگێڕیدا چالاکانە بەشداربوو. بە جۆش و خرۆش و ورەی گەنجانەوە رەنگی بە ژیانی گەریلا بەخشی. وەک هەموو هاوڕێکانی ئاوات و خواستی هاوڕێیەتی راستەقینە بوو لەگەڵ رێبەر ئاپۆ و شەهیدان. بۆ ئەوەش بەردەوام هەوڵی دەدا خۆی لە ئەندێشە و فەلسەفەی رێبەر ئاپۆدا قووڵ بکاتەوە، بۆ ئەوەی بتوانێت شۆڕشگێڕییەک بەئاراستەی راستی رێبەرایەتیدا بەرەوپێش ببات و تۆڵە لە دوژمن بکاتەوە. هەموو وزە و وردبوونەوەی خۆی لە سەر ئەو بنەمایانە رێکدەخست و خۆی لە بەرامبەر راستی دوژمن بەهێز دەکرد. لە رێگەی پاڕادیگمای رێبەر ئاپۆوە دەیویست خۆی بەوە بگەیەنێت و بیکاتە 'خودبوون'، لە چیا ئازادەکان دەیویست ببێتە دەنگی هەموو ژنان، بەتایبەتی ژنانی رۆژهەڵاتی کوردستان و ئێران. لەو چوارچێوەدا خۆی لە سەر پاڕادایمی رێبەر ئاپۆ پەروەردە دەکرد، بۆ ئەوەی گورزی گەورە لە دوژمنە داگیرکەرەکان بدات.
لەو کاتەیدا سەربازی زۆرەملێی سیستم بوو هاتە ناو ریزەکانی گەریلاوە
شەهید زاگرۆس زرێبار لە ناو بنەماڵە و ناوچەیەکی وڵاتپارێزدا گەورەبوو. لە منداڵیەوە لە نزیکەوە پەژاکی ناسی و لەگەڵ بەرەوپێشچوونی شۆڕشی رۆژهەڵاتی کوردستان گەورەبوو. لەو کاتەی شۆڕشی 'ژن، ژیان، ئازادی' دەستیپێکرد، سەربازیی زۆرەملێی ئێرانی دەکرد. لە بەرامبەر گوشارەکانی سیستم دژی گەلەکەمان لەو قۆناغەدا، هەڵوێستی وڵاتپارێزی گرتبەر و بەشداری لە ریزەکانی گەریلادا کرد. لە یەکەم ساتی بەشداربوونیەوە تا کاتی شەهیدبوونی بە هەڵوێستێکی گیانبازانە و بڕوایەکی بێهاوتاوە تێکەڵ بە ژیان و تێکۆشانی ئازادی بوو. هەموو ئەرک و بەرپرسیارێتییەکانی بە شێوەیەکی بەهێز جێبەجێ کرد و وەک رێبوار و شوێنکەوتوویەکی شەهیدان جوڵایەوە. ئامانجی ئەو وەک گەریلایەکی سەردەمی نوێ بریتیبوو لەوەی لە هەموو روویەکەوە خۆی بگەیەنێتە ئاستی جەنگاوەری راستەقینەی رێبەر ئاپۆ. لەسەر ئەو بنەمایەش لە رێگەی هزر و فەلسەفەی رێبەر ئاپۆوە بەردەوام لە رووی ئایدۆلۆژی و سەربازییەوە پەروەردە دەکرد.
وەک یەکینەکانی رۆژهەڵاتی کوردستان یەرەکە ئێمە بە رێزەوە یادی شەهیدانمان دەکەینەوە، سەرەخۆشی لە هەموو گەلی وڵاتپارێز و نیشتمانپەروەری کوردستان، بە تایبەتی بنەماڵەی بەڕێز و بەنرخی هەڤاڵانمان دەکەین. بەڵێن دەدەین ئاڵای تێکۆشانیان بەردەوام بە شەکاوەیی رابگرین و بە رزگارکردن و بونیادنانی کوردستانێکی ئازاد و دیموکراتیک تۆڵەیان بکەینەوە".
هـ . ب
