هەفتەى رابردوو بە بەشداریی هەزاران سەرباز ئۆپراسیۆنێک لە چیای جودی دەستیپێکرد و دوابەدواى ئەوەش لە ئێوارەدا ئاگرتێبەردانی دارستانەکان دەستیپێکرد و لەو کاتەوە تاوەکو ئێستا سوتانی دارستانەکانى چیای جودی بەردەوامە.

ئاگرەکە سەرەتا لە ناوچە دارستانییەکانی نەڤاڤا و جفانە دەستیپێکرد و ئەو ئاگرەش بە ئەنقەست لەلایەن سەربازانی تورکەوە بەردراوەتە ئەو دارستانە.

سەرچاوە خۆجێیەکان رایانگەیاند، سەرباری هەموو هەوڵ و داواکانیان بۆ کوژاندنەوەى ئاگرەکە، بەڵام هیچ کارێک بۆ کوژاندنەوەى ئاگرەکە نەکراوە و رێگاش بە هاووڵاتییان نادەن بچنە ناوچەکە و ئاگرەکە بکوژێننەوە.

هەروەها ئەو ئاگرەشی لە شارۆچکەى گوندکێ مەلاوە بەردرابووە دارستانەکان ئەویش بەردەوامیی هەیە.

ئەو ئاگرە ئەوەندە گەورەیە، کە لە ناوەندی گوندکێ-یەوە دەبینرێت.

ئەو ئاگرە کاتێک کەوتەوە، کە لە بنکەى سەربازیی ئاکدیزینگ لە ناوچەى باسانی شرنەخەوە دەستکراوە بە گولـلەبارانکردنی دارستانەکانى ئەو ناوچەیە و بەو هۆیەوە ئاگر بەربووەتە دارستانەکانی چیای گابار. ئاگرەکە دوێنێ ئێوارە بەردرایە دارستانی چیای گابار و تاوەکو ئێستا ئەو ئاگرە لە نێوان شارۆچکەکانى فندکێ و باسان دا بەردەوامیی هەیە.

ژ.ت