ئەمڕۆ لە شاری ئەستەنبول ئەندام پەرلەمانەکانی پارتی گەلانی دیمۆکراتیک هەدەپە لە چوارچێوەی ئامادەکاریەکانی ٣یەمین کۆنگرەی ئاسایی خۆیاندا بە مەبەستی بانگی بەشداریکردن، چوونە نێوە شەقام و لە سەر رێگای ئیستیقلال بڵاوکراوەیان بڵاو کردەوە، بەڵام لە لایەن پۆلیس و هێزە ئەمنیەکانەوە رێگرییەکی توندیان لێ کرا.
هێزە ئەمنییەکان بە مەرتاڵ دەوری هەر یەک لە (گارۆ پایلان و ئیمام تاشچی ئەر و زەینەل ئوزەن و ئەرۆل کاترجی ئۆغلوو عەلی کەنان ئۆغلوو) ی ئەندام پەرلەمانیان گرت.
'دەوڵەت لە راستی ئێمە دەترسێت'
زەینەل ئوزەن ئەندام پەرلەمانی هەدەپە وتی: " ئەم فشارانە ئاشکرای دەکەن کە دەوڵەت لە راستی ئێمە دەترسێت. تەنانەت رێگە نادەن بانگ بۆ سازکردنی کۆنگرەکەشمان بکەین."
'شتێک بە ناوی دیمۆکراسی و ئاشتی و ئازادی بوونی نییە'
لە لایەکی ترەوە عەلی کەنان ئۆغلوو ئەندام پەرلەمانی هەدەپە جەختی کردەوە کە لە تورکیا شتێک بە ناوی دیمۆکراسی و ئاشتی و ئازادی بوونی نیە و وتی: " ئەوانەی ئەم کردەوانە ئەنجام دەدەن، سبەی رۆژ حسابیان لێ دەپرسرێتە."
ئابلوقەی پۆلیس و هێزە ئەمنیەکان تا بەردەم باڵەخانەی هەدەپەی ئەستەنبول بەردەوام بوو.
ز.ش