تاڤگەى بێگرێ بەرزییەکەى ٢٠ مەترە و بە جوانییەکەى لە وەرزەکانى ساڵدا بە تایبەتى لە وەرزەکانی هاوین و زستاندا بۆ هەموو کەس سەرنجڕاکێشە. جوانیى ئەو تاڤگەیە لەلایەن بەرپرسانى دەوڵەتى تورکیاوە تێکدرا.

لە ماوەی ٢ مانگدا رووبەری ٧٥ دۆنم زەویى دەورووبەری تاڤگەکە چۆڵکرا و بەرپرسانى دەوڵەتى تورکیا بۆ کاری بیناسازیى پرۆژە بازرگانییەکەیان کۆنکرێت و چیمەنتۆیان تێڕژاند.

 بەرپرسانى دەوڵەتى تورکیا دەیانەوێت کاری کۆنکرێت و چیمەنتۆ تێڕژاندنى دەورووبەرى تاڤگەکە تاوەکو رۆژی ٢٩ی تشرینى یەکەم، کە رۆژی دامەزراندنى کۆماری تورکیایە تەواو بکەن.  

کاری تأڵانکردن و تێکدانى تاڤگەى بێگرێ لەلایەن شارەوانیى بێگرێ و پارێزگارێ وانەوە ئەنجام دەدرێت. ئەو دوو دامودەزگایەى دەوڵەتى تورکیا ٣ مانگ لەوە پێش بڕیاریاندا ناوچەکانى دەورووبەری تاڤگەکە بە کۆنکرێت و چیمەنتۆ دابپۆشن تاوەکو کافتریا و شوێنى پیاسەکردن و قاڵدرمەی تیادا دروست بکەن.

سەحەر قادر ئۆغڵو ئاتەش هاوسەرۆکی کۆمەڵەى ئیکۆلۆژیى میزۆپۆتامیا لە وان رایگەیاند، بەرپرسان گوێیان لە هیچ یەک لە هۆشدارییەکان نەگرت و بەردەوامن لە تاڵانکردن و تێکدانی تاڤگەى بێگرێ.

ئاتەش راشیگەیاند "ئەو شوێنە سروشتییە کە ماوەى ٢٠٠ ساڵە هەیە و هاووڵاتییان و گەشتیاران لە جوانییەکەى و سروشتە جوانەکەى سوودمەند دەبوون. ئێستا بە قسەى خۆیان دەیانەوێت بە کۆنکرێت و چیمەنتۆ و ئاسن بیپارێزن، ئەو کارە تەنها بۆ رانت و خواردنى پارەى ژێربەژێرە نەک پاراستنى ئەو ژینگە جوانەى ناوچەکە، چونکە هەر ئەو کارەیان دەبێتە هۆی تێکدان و شێواندنى جوانیى ئەو ژینگە جوان و سروشتییەى ناوچەکە".

سەحەر قادر ئۆغڵو ئاتەش ئەوەشى وت "سەرباری ئەوەى لە رێگەى تەندەرەوە پارەیان لەو پرۆژەیە دەستکەوتووە، بەڵام زیانى زۆریان بە سروشتی تاڤگەکە و دەورووبەری گەیاندووە. بیرە کۆن و دێرینەکانیان پڕکردووەتەوە، بۆیە پێویستە هەموو کەسێک خاوەنداری لە تاڤگەى بێگرێ و جوانییەکەى سروشتى ئەو ناوچەیە بکات".

ر.م