ئێوارەی ئەمرۆ لە گوندی پردەشاڵی بناری قەندیل ڕێپێوانێک بۆ بەرزڕاگرتنی بەرخۆدانی ۱٤ی تەموز بەرێوەچوو، لە ڕێپێوانەکەدا دروشمەکانی، “بمرێ فاشیزم و داگیرکاریی، بمرێ خیانەت و نۆکەری، بژی خۆراگری حەفتانین، بژی سەرۆک ئاپۆ” وترانەوە.

ئاواز ئیسماعیل، هاوسەرۆکی شارەوانی بناری قەندیل، ڕاگەیەندراوی ڕێکخەرانی ڕێپێوانەکەی خوێندەوە، کە تێیدا هاتبوو: دەوڵەتی داگیرکەری تورکیا بە سەرۆکایەتی ئەردۆغانی فاشیست و دیکتاتۆر، شاڵاوێکی نوێی هێرشی هەمە لایەنەی بۆ سەر گەلی کورد لە هەموو پارچەکانی کوردستان دەستپێکردووە، ئامانجی ئەم شاڵاوە نوێیەی داگیرکارییە ئەوەیە، کە لەبوارەکانی سیاسی، سەربازی کۆمەڵایەتی، کلتوری، ئابوری هەموو کوردستان داگیر بکات و هیچ هێمایەکی کوردی نەهێڵێت.

هەروەها هاتووە: ئەردۆغان، هەموو ئەو تاوانە ئەنجام دەدات، چونکە لە هەبوونی کورد دەترسێت، لە ئیرادەی ئازادی ژن دەترسێت، لە دارو بەردی کوردستان دەترسێت، لە هەر شوێنێک تەسلیم بوون نەبێت دەترسێت، ئەردۆغان لە هەبوون و لە کەسایەتی ژنی ئازاد و هەبوونی کۆمەڵایەتی و کلتوری و سیاسی کورد ترسی هەیە، گەورەترین دوژمنی ژنە و گەورەترین دوژمنی مرۆڤایەتییە.
لە بەشێکی دیکەی ڕاگەیەندراوەکەدا هاتبووە: بە داخەوە هێزە نێودەوڵەتی و هەرێمیەکان تەنانەت بەشێک لە دەسەڵاتدارانی باشوری کوردستانیش بەهۆی بەرژەوەندی تەسکی سیاسی و ئابوری و بنەماڵەیی-یان پشتیوانی ئەردۆغان دەکەن، بێدەنگی هەڵدەبژێرن و پاکانەی بۆ دەکەن و لە هەموو تاوانەکانی تورکیا چاوپۆشی دەکەن.

لە کۆتایی هاتبووە: پێویستە لە بەرامبەر ئەم شاڵاوە کۆمەڵکوژیی و داگیرکارییەدا بە گیانی ئارین میرکان و ڤیان جاف، دەستینا قەندیل، ڕوهەیڤ سلێمانی و ئاڤێستا خابوور بەرەنگاری زووحاکی سەردەم ببینەوە، ئێمەش وەکو گەلی بناری قەندیل وەکو ژنانی بناری قەندیل کە بە دەیان ساڵە پشتیوانیی هەموو شۆرشە کوردییەکانمان کردووە، ڕایدەگەیەنین: بەهەموو شێوەیەک لە دژی شاڵاوی داگیرکاریی ئەردۆغان دەوەستینەوە و ڕێگا نادەین دەستکەوتەکانی گەلی کورد لە ناو بچن و خاکەکەمان داگیر بکرێت، سەرچاوەی هێز و توانای ئێمەش خۆراگری ۱٤ی تەموزی زیندانیانی ئامەدە، کە بە زانابوون، ئیرادە و ئازایەتی و گیانفیدایی توانیان چۆک بە سیاسەتی ڕژێمی فاشیستی تورکیادا بنێن.
لە کۆتایدا بە دروشمی 'ژن، ژیان، ئازادی' و 'بژی سەرۆک ئاپۆ' کۆتایی بە ڕێپێوانەکە هات.

دوای ئەوەی لە نەورۆزی ساڵی ١٩٨٢ بە شەهیدبوونی مەزلوم دۆغان دەست بە چالاکی دەکرێت لە دژی ڕژێمی تورکیا، چالاکییەکان لەناو زیندانەکانیشدا بەردەوام دەبن، تا لە ١٤ی تەموزی ساڵی ١٩٨٢، مانگرتن تا مردن لەلایەن چوار ئەندامی دەستەی دامەزرێنەری پارتی کرێکارانی کوردستان- پەکەکە، دەستپێدەکات، پاشان ‘کەمال پیر دوای ٥٥ ڕۆژ مانگرتن لە خواردن، محەمەد خەیری دورموش ٥٨ ڕۆژ، عاکیف یەلماز ٦٦ ڕۆژ، عەلی چیچەکیش لە دوای ٦٧ ڕۆژ‌ لە مانگرتن لە خواردن، شەهید دەبن.

جگە لەو ژمارەیە چەندین کەسی دیکەی وەکو شەهید ساکینە جانسز و مستەفا قەرەسو، لەهەمان بەرخۆدان و چالاکیدا بەشدار بوون، ئەم بەرخۆدان و مانگرتنە لەسەر ئاستی تورکیا و جیهان دەنگی دایەوە تا ئێستاشی لەگەڵدابێت یەکێکە لە پایە هەرە بنەڕەتییەکان کە ئایدیۆلۆژیای پەکەکە’ی لەسەر داڕێژراوە بە جۆرێک کە لە ١٥ی ئابی ١٩٨٤ وەکو وەڵامێک بۆ ئەو هەوڵی لەناوبردنە، شەری چەکداری ڕاگەیاندرا و تا ئێستاش بەرخۆدان بەردەوامە.

ز.ش