پرۆسەى دەنگدان بۆ هەڵبژاردنى پەرلەمانى هەرێمى باشووری کوردستان کۆتایى پێهات. ماوەى دەنگدان لە کاتژمێر ٨ی سەرلەبەیانى تاوەکو ٦ی ئێوارە بوو. بەپێى زانیارییە سەرەتاییەکان رێژەى بەشداریکردن لە هەڵبژاردندا بە بەراورد بە هەڵبژاردنەکانى تر کەمیکردووە.
کاتژمێر ٨ی سەرلەبەیانیی ئەمڕۆ دەنگدان بۆ هەڵبژاردنی خولی پێنجەمی پەرلەمانى هەرێمى باشووری کوردستان (ئەنجوومەنی نوێنەرانی هەریمی کوردستان-عیراق) دەستیپێكرد.
ئەمڕۆ یەکشەممە ٣٠ی ئەیلولی ٢٠١٩ / ٨ی رەزبەر، لە کاتژمێر ٨ی سەر لە بەیانییەوە دەنگدەرانى هەرێمى باشووری کوردستان بۆ هەڵبژاردنى پێنجەمین خولی پەرلەمانى هەرێمى باشووری کوردستان (ئەنجوومەنی نوێنەرانی هەرێمی کوردستان-عیراق) چوونە سەر سندوقەکانى دەنگدان و مافی دەنگدانیان بەکارهێنا.
بەپێى زانیارییەکان تاوەکو کاتژمێر ٣ی ئێوارە رێژەى بەشداریکردن لە هەڵبژاردندا نزیکەى سەدا ٥٠ بووە، بەڵام تاوەکو ئێستا کۆمسیۆنى هەڵبژاردن و راپرسیى هەرێم لەبارەى رێژەى بەشداریکردنى دەنگدەران ئاماری بڵاونەکردووەتەوە.
هاوکات لەگەڵ داخستنى بنکەکانى دەنگداندا، دەستکراوە بە کردنەوەى سندوقەکان و جیاکردنەوەى دەنگى لایەنەکان.
بەپێى ئاماری کۆمسیۆنى هەڵبژاردن و راپرسیى هەرێم، بۆ دەنگدان ٢ هەزار و ١٧٥ بنکەی دەنگدان بۆ ٢ ملیۆن و ٩١٤ و هەزار ٩٩٢ دەنگدەر لە هەرێمی باشووری کوردستان، بۆ هەڵبژاردنی پێنجەمین خولی پەرلەمان بە رووی دەنگدەراندا کرابوویەوە.
بەپێى ئەو ئامارە، کە کۆمسیۆنى هەڵبژاردنەکانى هەرێمی باشووری کوردستان بڵاویکردووەتەوە، لە شاری هەولێر ١ ملێۆن و ٣٦ هەزار و ٤١٩ دەنگدانیان هەبوو. بۆ دەنگدانى ئەو دەنگدەرانە ٤٩٩ بنکەی دەنگدان و ٢ هەزار و ١٤٢ وێستگەی دەنگدان تەرخانکرابوو.
هەروەها لە پارێزگای سلێـمانی ١ ملیۆن و ١٣٤ هەزار و ٧٦٠ کەس مافی دەنگدانیان هەبوو و بۆ ئەو مەبەستەش کۆمسیۆن ٤٧٦ بنکە و ٢ هەزار و ٣٠٦ وێستگەی دەنگدانى بۆ دەنگدەران ئامادە کردبوو.
لە پارێزگای دهۆکیش ٢٥٧ بنکەی دەنگدان و هەزار و ٣٦١ وێستگەی دەنگدان، بە ڕووی ٦٧٧ هەزار و ٧٩٧ دەنگدەردا کرابوویەوە.
لە پارێزگای هەڵەبجەش ٦٦ هەزار و ١٦ دەنگدەر مافی دەنگدانیان هەبوو. بۆ دەنگدەرانى پارێزگاى هەڵەبجەش ٢٨ی بنەکەی دەنگدان و ١٣٢ وێستگەی دەنگدان ئامادە کراوە.
ئەو دەنگدانە بۆ هەڵبژاردنی پێنجەمین خولی پەرلەمانی هەرێمى باشووری کوردستان ئەنجام درا. لەم هەڵبژاردنەدا ٣٨ لیست و لایەن و هاوپەیمانی و قەوارە بەشداربوون. ٧٧٣ کەس، کە ٥٣٢ کەسیان پیاو و ٢٤١ کەسی تریشیان ژنن خۆیان بۆ ئەم خولەی پەرلەمانی باشووری کوردستان پاڵاوتبوو.
هەروەها لەم ھەڵبژاردنەدا ١٨ لایەن و لیست و قەوارەی پێکهاتەکانى هەرێم (تورکمان، مەسیحی و ئەرمەنی) بە ٦٥ کاندیدەوە کێبڕکییان دەکرد بۆ بەدەستهێنانی کورسیی پێکھاتەکان دەکەن.
پەرلەمانى هەرێمى باشووری کوردستان لە ١١١ کورسی پێکدێت و لەو ژمارەیە ١١ کورسییان بۆ پێکهاتەکانى تورکمان (٥ کورسی)، مەسیحی (٥ کورسی) و ئەرمەنیى (یەک کورسی) دانیشتووی هەرێمى باشووری کوردستان تەرخانکراوە.
ر.م
