فڕۆکە جەنگییەکانى دەوڵەتى تورکی داگیرکەر کاتژمێر ٠٤:٣٠ بەرەبەیانی ئەمڕۆ چیای ئەحمەدیان لە نێوان گوندی زارگەلی و زینی وەرتێی قەندیل بۆردومانکرد.

بەپێی زانیارییە سەرەتاییەکان ئەو بۆردومانە هیچ زیانێکى مرۆیی لێنەکەوتوەتەوە، بەڵام زیانی مادیی هەبووە.

چیای ئەحمەد شوێنێکە، کە دانیشتوانى زارگەلی و زینی وەرتێ و خەڵکی ناوچەکانى تر لەگەڵ هاتنی بەهاردا بۆ کۆکردنەوەى چەندین جۆر گژوگیا و گوڵ رووی تێدەکەن، بەڵام بۆردومانەکانى دەوڵەتى تورکی داگیرکەر بووەتە هەڕەشە بۆ سەر ژیانی هاووڵاتییانى مەدەنیی ئەو سنوورە و ناتوانن سوود لە سەرچاوە سروشتییەکانى ناوچەکانى خاکی خۆیان وەربگرن.

هێرشەکەى دەوڵەتى تورکی داگیرکەر لە کاتێکدایە، کە پارتی دیموکراتی کوردستان (پەدەکە) هێزێکى سەربازیی بردووەتە سەر زینی وەرتێ و ئەوەش ناکۆکیی زۆری لێکەوتووەتەوە. ئەو جموجوڵە سەربازییە لەو سنوورەدا، کە بە هاوبەشی لەگەڵ دەوڵەتى تورک ئەنجام دەدرێت، وەک هەوڵێک بۆ دژایەتیکردنی پەکەکە لێکدەدرێتەوە.

ژ.ت