لە کەرکوک ئەمرۆ ٨ی ئازار رۆژی جیهانی ژنان رێکخراوە مەدەنیەکانی بواری ژنان کونگرەیەکی رۆژنامەوانیان ئەنجامدا کە لە کۆنگرەکە باسیان لە خراپی دۆخی ژنانی شارەکە کرد و هەروەها چەند داواکاریەکیان ڕاگەیاند بۆ بەدیهێنانی دادپەروەری و یەکسانی لە نێوان هەردوو ڕەگەزدا.

بەیاننامەی رێکخراوە مەدەنیەکانی کاروباری ژنان لە لایەن هانا شکور خوێندرایەوە کە تیدا هاتبوو: "٨ی مارس ئەمساڵ لە کاتێکدایە وڵاتەکەمان لە بارودۆخێکی نەگونجاودایە بۆ گۆرانکاری و چاکسازی لە پێناو دادپەروەری کۆمەڵایەتی ویەکسانی و ژیانێکی سەربەرزانە، ڕاپەڕین دەنگێکی گەورە و بەرزی ناڕەزایەتی گەل بوو بەرووی هەموو هیز و لایەنە سیاسیەکان کە بەشداربوون لە بەریوەبردن و ئیدارەیەکی شکستخواردووی سیاسی و ئابوری و کۆمەڵایەتی و خزمەتگوزاری کە بەردەوام وڵاتیان بە پشک و پشکاری و ئیدارەیەکی پڕ گەندەڵ و دەرکەوتنی گروپی چەکداری نایاسایی و ناحکومی بەڕێوەدەبرد کە ئەمەش بووە هۆی دواکەوتوویی (ماف و ئازادی و خزمەتگوزاری و تەندروستی و ژیانی گەلەکەمان)."

هەروەها هانا شکور ووتی: "هەر لەم بارودۆخەدا ژنان ئەرکێکی قورسیان گرتووەتە ئەستۆ ئەویش گرنگی و کاریگەریان هەبوو لەناڕەزایەتی وخۆپێشاندانەکاندا داوای باشکردنی باری کۆمەڵایەتی و ئابوری و سیاسی و ئیدارییان دەکرد کە لە ژینگەیەکی ئارام و ئاساییدا و هەستکردن بە بەرپرسیاریتی کۆمەڵایەتی و نشتیمانی و دوور بێت لە توندو تیژی و نائارامی و پارێزگاری لە مافەکانمان بکەرێ بەو شێوەی لە دەستووردا هاتووە."

لە کۆتایدا هانا شکور بەناوی رێکخراوە مەدەنیەکانی کاروباری ژنان داواکاریی ئەو رێکخرانەی خوێندەوە کە تیدا هاتبوو:

یەکەم/ کارکردن لە سەر دامەزراندنی ئەنجومەنی ژنانی لێهاتوو کە دەزگایەکی یەکگرتوو و سەربەخۆ بێت بۆ هەستانەوە و کاریگەرکردنی ژنان.

دووەم/ پەلە کردن لە یاسای هەستانەوە و توندوتیژی دژی ژنان.

سێیەم/ کردنەوەی خولی تایبەت بە ژنان وەکو پۆلیس و ئەفسەر و لێکۆلەر.

چوارەم/ دابینکردنی شوێنی تایبەت بەژنانی هەڵهاتوو لە توندوتیژی.

پێنجەم/ دانانی پڵان و رووبەرووبوونەوەی هۆکارەکانی خۆکوشتنی ژنان.

شەشەم/ باشکردنی ژیانی ژنان لە رێگەی پێدانی سلفەی قەرز.

حەوتەم/  کارکردن بۆ جێبەجێ کردنی بڕیاری ئەنجومەنی ئاسایشی نێودەوڵەتی ژمارە(١٣٢٥)تایبەت بە ژنان.

ف.ق