لە ئێران دەستگیرکردنی هاوڵاتیانی ناڕازی بەردەوامە
هێزە ئەمنییەکانی کۆماری ئیسلامی ئێران بە بیانووی بەشداری کردن لە خۆپیشاندانەکان لە رەشبگیری هاوڵاتیان بەردەوامن.
لە ئێران و ڕۆژهەڵاتی کوردستان، هێزە ئەمنیەکان بەردەوامن لە گرتن، تۆقاندن و میلیتاریزەکردنی زیاتر شار و ناوچەکان.
لەو چوارچێویەدا، ڕەشبگیری و دەستگیرکردنی هاوڵاتیانی کورد و ئێرانی بەبیانوی گوایا بەشداری خۆپیشاندانەکان بوون درێژەی هەیە. لەو بارەوە کۆمەڵەی مافی مرۆڤی کوردستان ڕاگەیاند:
ڕۆژی شەممەی رابردوو، ئەمجەد یوسفی دانیشتوی شارۆچکەی پیرانشاری ڕۆژهەڵاتی کوردستان، لە لایەن ئیدارەی ئیتلاعاتی شارەکەوە ڕفێندراوە و تائێستا چارەنوسی بەنادیارە و ئاشکرای کرد، ناوبراو خاوەنی دوو منداڵە و وێنەی ئەمجەد و منداڵەکانی بڵاوکردوەتەوە.
هەفتەی ڕابردووش، جەمیل یارئەحمەدی، دانیشتوی شارۆچکەی جوانڕۆی پارێزگای کرماشان، لەلایەن ئیتلاعاتی شارۆچکەکەوە دەستبەسەر کراوە و ئەویش وەک یوسفی چارەنووسی نادیارە.
