بە ئامانجی کارکردن لە دژی داگیرکارییەکانی دەوڵەتی تورک بۆ سەر باشور و ڕۆژئاوای کوردستان، هەر سێ بەرەی دەنگی نیشتمان، بەرەی پشتیوانی لە ڕۆژئاوای کوردستان و بەرەی ژنانی باشور بۆ پشتیوانی ڕۆژئاوا'، کە لە شاری سلێمانی و سەرجەم شاروشارۆچکەکانی دەوروبەری کاردەکەن، بوون بە یەک و لە ژێر چەتری "دەستەی هەماهەنگی" کۆبوونەوە.

بەرەی دەستەی هەماهەنگی بە جیاواز لە سەرجەم ئەندامەکان، لەلایەن نۆ  کەسەوە سەرپەرشتی دەکرێت، کە پێکهاتوون لە هونەرمەندان، چالاکوانان، مامۆستایان، پارێزەران، ڕۆژنامەنووسان و پەرلەمانتاران و بەشێک لە کەسایەتییەکان و تەواویی هاوڵاتیان.

چوارچێوەی کارکردنی ئەم دەستەیە قۆناغ بەندی بۆ کراوە و هەنگاو بە هەنگاو بۆ پرسە نەتەوەییەکان بە شێوازی جیاواز دەچنە پێشەوە و لەم ماوەیەدا چەندین خۆپیشاندانیان ئەنجام داوە، هەروەها هەڵمەتی بڵاوکردنەوەی بڵاوکراوەی بایکۆتکردنی کاڵای تورکیان لە شەقام و شوێنە گشتییەکان ڕاگەیاند، هاوکات بە بەیاننامە و شێوازی دیکە بەردەوامن لە چالاکییەکانیان.

هەروەها هەر ئەندامێکیان هەڵمەتێکی ڤیدیۆیی خۆی تۆمار کردووە و بە وتنەوەی 'وەک ئەرکێکی ئەخلاقی و نیشتمانی بەڵێ بۆ بایکۆتی کاڵای تورکی' و بڵاویان کردووەتەوە.

قۆناغی دواتریشیان کە ڕۆژانی داهاتووە، کارکردنە بۆ کردنەوەی پێشانگایەک بۆ نمایشکردنی وێنەی خەڵکی ڕۆژئاوای کوردستان کە بە چەکی قەدەغەکراو لەلایەن دەوڵەتی تورکەوە.

ف.ق