سەلچوک مزراکلی هاوسەرۆکی گەورە شارەوانی ئامەدی هەدەپە کە لە لایەن ڕژێمی ئاکەپەوە دەستگیرکراوە، نامەیەکی بۆ ڕای گشتی نێودەوڵەتی نارد. مزراکلی باسی لەو بانگەشە بێ بنەمایانە کرد کە بەرامبەر بڵاودەکرێنەوە و وتی، "سیستمی دادپەروەری تورکیا بە تەنها لە خزمەتی پارتێکدایە."

مزراکلی بەبیریهێنایەوە کە لە هەڵبژاردنی ٣١ی ئازاری ٢٠١٩دا ٦٩.٩٪ دەنگەکانی بۆ پۆستی سەرۆک شارەوانی ئامەد بەدەستهێناوە و لە ١٩ی ئابی ٢٠١٩ لە ئەرکەکەی دوورخراوەتەوە و لە جێگەی قەیوم دامەزراوە و لە ٢٢ی تشرینی یەکەمیش دەستگیرکراوە.

مزراکلی وتی، "دەستگیرکردنی ئیرادەی گەل، بڕیارێکی یاسایی نییە. ئامانجەکەی ئەوەیە رێگە نەدەن کورد شارەکانی بەڕێوەببات."

هاوسەرۆکی شارەوانی ئامەد ئاماژەی بەوەکرد، لە تورکیا کۆمەڵکوژی یاسایی ئەنجامدەدرێت و پێوانەی زوڵمکردن لە بێتاوانی بووەتە کارێکێ تایبەت.

مزراکلی وتی، "هۆکارێکی دەستگیرکردنی، وەرگرتنی وتەی کەسێکە بە ناوی "H.B.A" کە لە مانگی ئازاری ٢٠١٦ دا لە ناوچەی نسێبینی مێردین دەستگیرکرا و ١١ ڕۆژ بەر لە هەڵبژاردن لە ٢٠ی ئازاری ٢٠١٩ لەبارەی ئەوەوە قسەی کردووە."

مزراکلی دەڵێت، " ئەو کەسە ویستویەتی سود لە یاسای پەشیمانی وەربگرێت و لە ٢٠ی ئازاری ٢٠١٩ لەدژی من وتویەتی، 'گوایە لەو نەخۆشخانەی کە کارم تێدا دەکرد، لە کاتی ئیشکگری شەودا نەشتەرگەریم بۆ "ئەندامێکی رێکخستن" کردووە. ڕیخۆڵەکەیم لێکردووەتەوە و بۆ بەیانیەکەی لە نەخۆشخانە چووەتە دەرەوە. ئەو کەسە لە زاری کەسێکی ترەوە ئەو ڕووداوەی گێڕاوەتەوە. بۆیە ڕاست نییە و نە رووداوێکی بەم شیوەیە هەیە و نە منیش کارێکی بەو شێوەیەم کردووە."

هەروەها لە نامەکەیدا ئەوەی خستووەتەڕوو، پارتەکەی هەدەپە بە دەنگە ٦ ملیۆنیەکەی لە هەموو تورکیا پارتی سێیەمی سیاسی ئۆپۆزسیۆنە، بۆیە بەشداریکردن لە هەدەپە نابێت وەک تاوان ببینرێت.

مزراکلی ڕاشیگەیاند، لە ١٩ی ئابی ٢٠١٩، پانزە هاوسەرۆکی شارەوانی هەدەپە دەستگیرکران و وەزارەتی ناوخۆی تورکیا قەیومی لەجێگەیان دامەزراند. و وتی، "لە تورکیا دادپەروەری بە تەنها وشەیەکە کە لە سەر دیوارەکانی دادگا نووسراوە و سیستمی داد بە تەواوی لەخزمەتی تەنها پارتێکدایە."

لە کۆتایی نامەیەکەیدا مزراکلی داوا لە ڕای گشتی نێودەوڵەتی، ڕێکخراوەکانی مافیی مرۆڤ و هێزە دیموکراتەکان کرد لەدژی دەستبەسەرداگرتنی مافی هەڵبژاردنی کورد لە تورکیا هەڵوێست نیشان بدەن و بۆ کۆتاییهێنان بە فشارەکانی سەر پارتە سیاسیەکان خەبات بکەن.

ف.ق