دوێنێ برێت مەکگۆرک، نوێنەری تایبەتی سەرۆکی ئەمریکا بۆ شەڕی دژی داعش گەیشتە هەولێر و بەپێی سەرچاوەیەکی تایبەتی ڕۆژنیوز بانگهێشتی سەرجەم حزب و لایەنە سیاسییەکانی باشوری کردووە بۆ شاری هەولێر بەمەبەستی کۆبوونەوە لەگەڵیان.

سەرچاوەکە، وتی: برێت مەکگۆرک سەرەتا بەجیا لەگەڵ حزبەکان کۆدەبێتەوە و دواتر کۆبوونەوەیەکی گشتی ئەنجام دەدات، ئەمڕۆش یەکەم کۆبوونەوەی لەگەڵ شاسوار عەبدولواحید، سەرۆکی جوڵانەوەی نەوەی نوێ دەستپێکرد.

وتیشی: کۆبوونەوەکان گفتوگۆکردنە لەبارەی باردۆخی هەرێمی کوردستان بەتایبەت کشانەوەی بزووتنەوەی گۆڕان و کۆمەڵ و یەکگرتووی ئیسلامی لە حکومەت و چۆنیەتی کارکردنی ئەم حکومەتە تا کاتی هەڵبژاردن.

سەرچاوەکە، ئاشکراشیکرد، کە تەوەرێکی تری کۆبوونەوەکە قسەکردنە لەسەر دەرئەنجامەکانی ڕیفراندۆم و رووداوەکانی ١٦ی ئۆکتۆبەر و کێشەکانی ئێستای نێوان هەولێر و بەغدا.

هەر دوێنێ، عومەری سەید عەلی، ڕێکخەری گشتی بزووتنەوەی گۆڕان بەیاوەری چەند ئەندامێکی خانەی ڕاپەڕاندن گەیشتە شاری هەولێر و دوای چەند کۆبوونەوەیەک لەگەڵ ئۆرگانەکانی گۆڕان و ئەندامانی پەرلەمانتارانیان لە هەرێمی کوردستان و تیمی گۆڕان لەحکومەت شەوی رابردوو لەگەڵ عەلی باپیر ئەمیری کۆمەڵی ئیسلامی کۆبوونەوە.

سەرلەبەیانی ئەمڕۆش لەگەڵ مەکتەبی سیاسی یەکگرتووی ئیسلامی کۆبووەوە.

چاوەڕێ دەکرێت ئەمڕۆ مەکگۆرک لەگەڵ عومەری سیەد عەلی، عەلی باپیر و سەلاحەدین بەهادین-دا کۆببێتەوە.

مەکگۆرک پێش کۆبوونەوەی لەگەڵ حزبەکان، شەوی ڕابردوو لەگەڵ نیچیرڤان بارزانی، سەرۆکی حکومەتی هەرێمی کوردستان و قوباد تاڵەبانی، جێگری سەرۆکی حکومەت کۆبووەوە.