گه‌ریلاكانی هه‌په‌گه له ده‌ڤه‌ری سیده‌كانی باشووری كوردستان و ناوچه‌ی چه‌لێی باكووری كوردستان، ڕه‌بایه‌كانی سوپای توركیای داگیركه‌ریان كرده ئامانج. هه‌په‌گه ڕایگه‌یاند، لایه‌نی كه‌م ١٨ سه‌رباز كوژراون.
ناوه‌ندی ڕاگه‌یاندنی هێزه‌كانی پاراستنی گه‌ل (هه‌په‌گه) ڕایگه‌یاند، هێزه‌كانی گه‌ریلا ٢٥ی تشرینی یه‌كه‌م\٣ی گه‌ڵاڕێزان له سیده‌كان و چه‌لێ له چوار قۆڵه‌وه چالاكییان دژی هێزه‌كانی توركیای داگیركه‌ر ئه‌نجام داوه. هه‌په‌گه ڕاشیگه‌یاند، له ده‌ڤه‌ری چیای جوودیی شرناخ گه‌ریلاكان ٢ چالاكییان كردوون، به‌ڵام هێشتا ئه‌نجامه‌كه‌ی ڕوون نه‌بووه‌ته‌وه.
له سیده‌كان ٥ ڕه‌بایه تێكدران و ١٤ سه‌رباز كوژران
ده‌رباره‌ی چالاكییه‌كه‌ی سیده‌كان هه‌په‌گه ڕایگه‌یاند: «٢٥ی تشرینی یه‌كه‌م\٣ی گه‌ڵاڕێزان كاتژمێر ٩ هێزه‌كانمان دۆڵی عه‌لی درێژ-ی سیده‌كان له باشووری كوردستان، دژی سوپای توركیای داگیركه‌ر چالاكییان كردووه. له چالاكییه‌كه‌دا گورزی سه‌ركه‌وتوانه له ڕه‌بایه‌كانی دوژمن دراوه. له‌م چالاكییه‌دا ٥ ڕه‌بایه ڕووخێنران و ڕوون بوویه‌وه كه ١٤ سه‌ربازی دوژمن كوژراون. هه‌روه‌ها دڕۆنێكی داگیركه‌ران له لایه‌ن هێزه‌كانمانه‌وه خرایه خواره‌وه. سوپای توركیای داگیركه‌ر له دوای چالاكییه‌كه به فڕۆكه جه‌نگییه‌كان بۆمبارانی ناوچه‌كه‌ی كرد و به كۆپته‌ری جۆری سكۆرسكی-ش كوژراو و برینداره‌كانی هه‌ڵگرته‌وه.»
له چه‌لێ ٣ ڕه‌بایه تێكدران و ٤ سه‌رباز كوژران
له درێژه‌ی ڕاگه‌یه‌نراوه‌كه‌دا ئاماژه به ٣ چالاكیی گه‌ریلاكان كراوه له هه‌مان ڕۆژدا كه له گردی خه‌ره‌گۆل-ی چه‌لێ ئه‌نجام دراوه و ٣ ڕه‌بایه‌ی سه‌ربازی تێكدراون و ٤ سه‌رباز كوژراون.
هه‌په‌گه ڕایگه‌یاند: «٢٥ی تشرینی یه‌كه‌م\٣ی گه‌ڵاڕێزان له گردی خه‌ره‌گۆل-ی سه‌ر به ناوچه‌ی چه‌لێی جۆله‌مێرگ كاتژمێر ١٠:٣٠ و ١٢:٤٥ سێ چالاكی له دژی یه‌كینه‌كانی دوژمن ئه‌نجام دراوه. له چالاكییه‌كاندا ٣ ڕه‌بایه‌ی دوژمن بوونه ئامانجی هێرشی هێزه‌كانمان و تێكدران، هه‌روه‌ها ڕوون بوویه‌وه كه ٤ سه‌رباز كوژراون.»
چالاكی له جوودی
ناوه‌ندی ڕاگه‌یاندنی هه‌په‌گه ئاماژه‌ی بۆ ئه‌وه كردووه كه هێزه‌كانی توركیای داگیركه‌ر ڕۆژی ٢٣ی تشرینی یه‌كه‌م\١ی گه‌ڵاڕێزان ئۆپه‌راسیۆنێكیان له دژی ده‌ڤه‌ری كورسێ كه‌چا، یڵدز ته‌په‌سی و گوندی ئاكێتێی چیای جوودیی سه‌ر به شرناخ ده‌ستپێكردووه.
«٢٤ی تشرینی یه‌كه‌م\٢ی گه‌ڵاڕێزان كاتژمێر ١٣ هێزه‌كانمان له چوارچێوه‌ی هه‌ڵمه‌تی شۆڕشگێڕیی شه‌هید ده‌لال و شه‌هیدانی به‌ستادا چالاكییه‌كیان له ده‌ڤه‌ری یڵدز ته‌په‌سی دژی یه‌كینه‌كانی دوژمن ئه‌نجام داوه. له‌م چالاكییه‌دا له ٢ قۆڵه‌وه گورزی سه‌ركه‌وتوانه له په‌ناگه‌كانی دوژمن دراوه، ژماره‌ی كوژراو و برینداره‌كان ڕوون نه‌بووه‌ته‌وه. سوپای توركیای داگیركه‌ر دوای چالاكییه‌كه كاتژمێر ١٤:٣٠ به‌بێ ئه‌نجام له ناوچه‌كه كشاوه‌ته‌وه.»
s.m
