هێزێکی پاسەوانی سنووری عێراق چوونە سنووری برادۆست​​​​​​​

هێزێکی پاسەوانی سنووری سەر بە سوپای عێراق چوونە هه‌رێمی برادۆستی باشووری كوردستان، کە ماوەیەکە سوپای تورکیای داگیركه‌ر هێرشی ده‌كاته‌سه‌ر.

ئاژانسی ڕۆژ نیوز بڵاوی كرده‌وه‌، پاشنیوەڕۆی ئەمڕۆ هێزێکی پاسەوانی سنوور-ی سەر بە سوپای عێراق، کە لە ١٥ ئۆتۆمبێل پێکهاتبوون، چوونەتە هه‌رێمی برادۆستی باشووری كوردستان.

هێزەکە له‌ دەوروبەری گوندەکانی بەرمیزە، لێلکان و مێرگەسۆر-ی سەر بە شارۆچكه‌ی سیدەکان گەڕاون و پاشان لەگەڵ زوبێر خالد، فەرماندەی هێزەکانی پێشمەرگە لەو ناوچەیە کۆبوونەتەوە. لەبارەی هۆکاری چوونی ئەو هێزە و ناوەڕۆکی کۆبوونەوەکانیان، زانیاری ڕوون بەدەست نەگەیشتووە. له‌ دوای کۆبوونەوەکە، هێزەکەی سوپای عێراق ناوچەکەیان جێهێشتووە.

جێگه‌ی ئاماژەپێکردنە، ئەو گوندانەی کە ئەمڕۆ هێزەکەی سوپای عێراق-ی به‌سه‌ری كردوونه‌ته‌وه‌، بەم دواییانە بوونەتە ئامانجی هێرشەکانی سوپای تورکیا و چه‌ندین كیلۆمه‌تر خاكی باشووری كوردستانیان له‌و سنووره‌ داگیركردووه‌.

s.m