کاتژمێر ٠٦:٠٠ ی ئێوارەی ئەمڕۆ، کۆبوونەوەی شاندی حکومەتی عێراق بەسەرۆکایەتیی ئەمینداری گشتی سەرۆکایەتی ئەنجومەنی وەزیرانی عێراق و شاندی حکومەتی ھەرێم بەسەرۆکایەتیی کەریم سنجاری، وەزیری ناوخۆی حکومەتی ھەرێم لە شاری ھەولێر کۆتاییهات.

بەپێی راگەیێندراوی هاوبەشی شاندی حکومەتی عێراق و هەرێمی کوردستان، کۆبوونەوەکانی ئەمڕۆ بە پێنج لیژنە بوون؛ لە بوارەکانی ئاسایش و سنوور، فڕۆکەخانەکان، گومرگ، دەروازە سنوورییەکان، بەنداوەکان و نەوتدا بوون.

لە کۆبوونەوەکەدا گفتوگۆ کراوە لەبارەی سەرجەم خاڵەکانی تایبەت بە ئەرک و بەرپرسیارێتی دەسەڵاتی فڕۆکەوانی ئیتیحادی و لەسەر ئەو خاڵانەی خوارەوە ڕێککەوتن:

1. فڕۆکەخانەکانی هەولێر و سلێمانی پابەنددەبن بە یاسای دەسەڵاتی فڕۆکەوانی مەدەنی عێراق ژمارە 148ی ساڵی 1974 هەموارکراو و سەرجەم رێنماییەکانی کە لە دەسەڵاتی فڕۆکەوانییەوە دەردەچێت.

2.  پشتبەستن بە رەزامەندییەکانی دەسەڵاتی فڕۆکەوانی بۆ نیشتنەوە لە فڕۆکەخانەکانی هەولێر و سلێمانی، رێگەنەدان بە نیشتنەوە و فڕینی هیچ فڕۆکەیەک لە فڕۆکەخانەی هەولێر و سلێمانی بەبێ رەزامەندی دەسەڵاتی فڕۆکەوانیی.

3. نوێنەرانی بەشی گواستنەوەی ئاسمانی ئاسایش و سەلامەتی فڕۆکەوانی سەر بە دەسەڵاتی فڕۆکەوانی لە هەردوو فڕۆکەخانەی هەولێر و سلێمانی دەبن بە بەردەوامی، وەک یەکێک لە داواکارییەکانی رێکخراوی ئەیکاو.

4. ئیدارەی فڕۆکەخانەی هەولێر و سلێمانی سیستەمی کرێی فڕۆکەخانە مەدەنییەکانی ژمارە 5ی ساڵی 2008جێبەجێ دەکەن، لەگەڵ پێدان و ئاشکراکردنی حیساباتی کرێی نیشتنەوەی فڕۆکەکان و باجی مانگانەی گەشتیاران.

5.  کۆبوونەوەی خولی مانگانە بە سەرۆکایەتی دەسەڵاتی فڕۆکەوانی بۆ سەرجەم بەڕێوەبەرانی فڕۆکەخانەکان ئەنجامدەدرێت، بەمەبەستی پەیوەندیی و چارەسەرکردنی کێشەکان.

6.  دانانی رێکخەری فڕۆکەخانەکانی هەولێر و سلێمانی بۆ ئاسانکاری پەیوەندی لەگەڵ دەسەڵاتی فڕۆکەوانی و بەشێوەیەکی هەمیشەیی بوونی دەبێت لە دەسەڵاتی فڕۆکەوانی.