ئمساڵ لە وەختێگا چیمنە پیری نەورووز ک مەرحەلەیک تازە لە تێکووشانمان ئەڕا رەسین وە ئازادی و دموکراسی دەسوەپێ کەد، مەرحەلەیک فرە حەساس و چارەنۊسساز شروو کەید، لە ناو فرەتر لە ٦ ساڵ تێکووشان و گیانفەدایی رووڵەیل و دووسەیلمان لە وەرانوەر تاریک پەرەستەیل دەوران، داعش کوتایی هاوردیم.

لە دەوران دۊای داعش هێرش و پلان داگیرکەرەیل و زڵهێزەیل وە شیوەیل ترەک دژ وە گەل و نیشتمانمان درێژە دریەد، چۊگە پلانیان لە چوارچوەی داعش سەرنەکەفت و رووڵەیل ئازادی ئەو پلانە پۊچەل کردن.

ئەیەر لە ئی دەورانە بتوایم سەرکەفتن لە وەرانوەر زەهاکەگان وە دەس باریم و زنەیێگ ئازاد و بەرابەر داشتۊمن بایس فاشیسم مەزهەبی ئیرانی و فاشیسم شوڤنیسم تورک لە ناو بوەیم، فاشیسم مەزهەبی رژیم داگیرکەر ئێران ک وە شیوەی تاوانن، تەک رەنگ کردن کۆمەڵگایەیل و دەسگیری هەڕەمەکی، کەمەر  ئەڕا لە ناو بردن گەل کورد بەساس، لە لایترەک فاشیسم رژیم داگیرکەر تورکیە وە شیوەی سیاسەت قڕ کردن سیاسی و هێرشەیل موستەقیم نزامی، وەتەمای لە ناو بردن گەل کوردە.

نەوڕووز ئمساڵ لە رەوشێگ جەژن گریمن ک فرەتر لە یەی ساڵه تەبەقەێ کارگەر لە ئێران وە شۆعار کار، نان، ئازادی، حکوومەت شەورایی -ک یەکەم کەڕەت لە دەم مەردم قارمان کرماشان هاتە دەیشت، خیاوان، کارخانه و مهدرهسه کردنهسه شوون تێکووشان. هاووەخت وەگەرد ئەی ناڕەزایەتیەیلە قەیران ئابووری و سیاسەت دەیشت ڕژیم ئێران، فرە بێ مدوو نێیە، تەنانەت توانیمن ئەی قەیرانە گەورەترین قەیران ڕژیم ئسلامی لە وەرەتاێ دامەزریانێ هەتا ئیسە بزانیمن. بایەد وە یە ئاماژە بکەیمن ک تەبەقەێ کارگەر توانستیە لە وەخت جمشت بەفرانبار (دەی) تا ئێرەنگە وە هەزاران کووبۊنەوە و ئێعتساو دەسەوەری خوەی لە جمشت ناڕەزایەتی گەلان ئێران نیشان بیەێت.

ئیمه چۊ پلاتفۆرم یارسان لە شههیدهیل ئهی جمشته -لە شەهیدەیل دوروود، تویسرکان، ئیزە و کرماشان- ڕێز گریمن و له ئارمان ئازادیخوازانە و عەداڵەتخوازانەێ ئەی جمشتە پشتیوانی کەیمن، و ئەی ناڕەزایەتیەیلە نیشانەێگ لە کەژکارکردی سیستەم سەرمایەداری لە ئێران و زەرووری بۊن یەێ ئالترناتیڤ سۆسیالیستی ئەڕاێ خەڵقەیل ئێران بزانیمن.

هەلەێوا ئیمە ناڕەزایەتی دەرویشەیل نێعمەتوللاهی گونابادیێش، ئەڕا ئازادی، سکوولاریزم و ماف کەمینەیل ئایینی لە ئێران وەحساو تێریم و ئێعترازەیل ئەوانەیش لە جمشت بەفرانبار فرە گرنگ زانیمن، و وەگەرد حەقخوازی ئەوانە، وە تایوەت دەرویشەیل زندانی -لە ژن و پیا- ک لە بێدادگایل ڕژیم ئێران حۆکمەیل ناحەق سەنگین گرتنە و ئیسە لە زندانن، هاودەنگی خوەمان ئێلان کەیمن.

رژیم سەرمایەداری ئێران لە چل ساڵێگ ک لە دەسەڵاتێ گوزەریەد وە هۊچ شیوەیگ رەنگ و دەنگەیل ترەک کۆمەڵگایەیل قەبول نەکردیە و تەقەلای تاواننیان لە ناو خوەی داس، دەسەڵاتدارەیل رژیم هەتا ئیسە هۊچ هەنگاوێک ئەڕا وەرەسمی ناسین کۆمەڵگای یارسان ئەنجام نەیاس و ئی تازەیێشە دەس کردیەسە ئەنجام دان دیدار و سەردان، کۆمەڵگای یارسان وەگشتی و گەورایەیل کۆمەڵگای یارسان بایس ئەو راسیە خاس بزانن، دیدار و سەردان دەسەڵاتدارەیل رژیم لە چوارچوەی قانجازەیل خوەیان، نواگیری لە ناڕەزایەتی و داوای ماف کردنە، نمونەی وەرچەو، کردەوەیل رژیم لە شوون هاتن زەویلەرزەی شارسان سەرپێڵزەهاوە، ک هەتا ئیسە نە ئەوەیکە کارێک ئەنجام نەیاس بەلکو وە شوون پەیرەو کردن سیاسەت تاوانن بیە، لە سەر ئی ئەساسه بایس کۆمەڵگا وەگشتی هووشیار بووت و لە ژێر دەسەڵات و هەژمونی رژیم جێ نەگرن و لە ئەگەر ئەنجام دان دیدار، ماف بەرابەر و رەسمی ناسین کۆمەڵگای یارسان لە قانون ئەساسی وە  ئەساس بگریەد ک ئەویش بایس لە زۊتەرین وەخت بچوودە بوار کرداری و جێ وە جێ بکریەد.

کاوە ئاسنگەر لە وەرانوەر زەهاک، سولتان سەهاک و یارەیلێ لە وەرانوەر  تاریک پەرەستەیل زەمانە سپای چیچەک، شا تەیموور بانیارانی لە وەرانوەر شاهەنشایی قاجار، ئەڕا هاوردنە ئارای زنەیێگ ئازاد و بەرانبەر شەڕ و تێکۆشان ئەنجام دان و لە ئی مەرحەلەی زەمانیە هووشیاری و حس مەسئولیەت نیشان دان کۆمەڵگای یارسان فرە موهم و زەرووریە، چۊگە کۆمەڵگای یارسان بایس شوون و لوون خوەی لە ناو جەولانگای سیاسەت دیاری بکەید و بوودە دەسەوەر. ئەگەر کۆمەڵگای یارسان خوەی وەرێکخستن نەکەید و ئامادەگی گووڕیان و هاتنەئارای هەر جوورە رۊداوێک نەیاشتیۊ، لەتمەیل گەورایک دریەت لە کۆمەڵگا.

لە ئی بەینە زوورم تێکووشان، کەفێدە سەر شان ژنەیل کۆمەڵگا، بایستەس نەورووز وە جوور زایش، نووبۊن و ژیان لە سەرەتا وە ئەساس بگرن، وە شیوەیگ جوور رووژ داڵک بنووڕنە پێ، ژن بایس وە ئرادە و روح پاوەگەزدان نەورووز، لەیلایەیل، داڵگەیل شەهید و ئاشتی، تێکۆشانیان وەهازتر بکەن.

ئیمە جوو پلاتفۆرم یارسان، سەربار پیرووزبایی جەژن نەورووز لە رابەر ئاپۆ، شەهیدەیل ئنقلابی مەزڵووم دۆغان، شاهین داڵەهوو، سمکۆ داڵاهوو، سەی قوربان حوسەینی، بەهمەن خوسرەوی، سوهراب غوڵامی، مەحموود خامووشیان، دەوریش براگەورە، نیکمەرد تاهری، حەسەن رەزەوی، موحەمەد قەنبەری، سەی رامین موشەشەعی، مێهرداد چەمەنی و گشت شەهیدەیل رێ ئازادی، تێکۆشەرەیل، گەل کورد و وە تایوەت کۆمەڵگای یارسان ، داوا لە گشت گەل کورد، کۆمەڵگای یارسان و ئنسانەیل ئازادیخواز کەیم پشتیوان یەکتر بن و وە روح “پاوەگەزدان” نەورووز ئمساڵ جەژن بگرن و تەقەلایان ئەڕا وە ئارا هاوردن کۆمەڵگایک ئازاد و برابەر وەروڵاتر بکەن.

ر.م