ئاژانسى هەواڵی رۆژ نیوز بڵاویکردووەتەوە، گروپێک لە ئەندامانى فراکسیۆنى پەدەکە لە پەرلەمانی هەرێمى کوردستان، سەرلەبەیانیى رۆژی شەممە سەردانى هەرێمى برادۆسیتان کردووە.

ئەو گروپە لەگەڵ بەڕێوەبەری ناوچەى سیدەکان و لەگەڵ خەڵکى ناوچەکەدا کۆبوونەوەیان ئەنجامداوە.

بەپێى زانیاریى سەرچاوە خۆجێیەکان، ئەو گروپە پەرلەمانتارەى پەدەکە دەیانەوێت خەڵکی ناوچەکە لە دژی پارتی کرێکارانى کوردستان (پەکەکە) و حیزبەکانى رۆژهەڵاتى کوردستان هەڵوێستیان هەبێت و خۆپیشاندان ئەنجام بدەن.

هەروەها پەرلەمانتارەکانى پەدەکە بە خەڵکى ناوچەکەیان وتوە، بەهۆی بوونی پەکەکە و حیزبەکانى رۆژهەڵات، تورکیا و ئێران هەرێمەکە بۆردومان دەکەن.

سەرنجڕاکێش ئەوەیە، ئەو هەوڵەى پەدەکە هاوکاتە لەگەڵ هەوڵ و ئامادەکارییەکانى خەڵکی هەرێمى برادۆست بۆ ئەنجامدانى خۆپیشاندان لە دژی بۆردومانەکانى دەوڵەتى تورک.

چاوەڕێ دەکرا، خەڵکی هەرێمەکە دواى نوێژی رۆژی هەینى ١٢ی تەمموزی ٢٠١٩ / ٢١ی پووشپەڕ خۆپیشاندانیان لە دژی بۆردومانەکان و دەوڵەتى تورک ئەنجام بدایە، بەڵام لەلایەن بەڕێوبەرانى هەرێمەکەوە رێگرییان لێکرا و پەدەکە دەیەوێت و هەوڵ دەدات هەڵوێستى خەڵکى ناوچەکە پێچەوانە بکاتەوە.

سەرباری ئەوانە تاوەکو ئێستا پەدەکە نەیتوانیوە خەڵکى هەرێمەکە بخاتە ناو پیلانەکەى خۆی و خزمەتی تر بە داگیرکەران بکات و خەڵک بۆ بەرژەوەندیى خۆیان بەکاریان بهێنن.

ئەرشەد حسێن لۆلانى پەرلەمانتاری پەدەکە ١ی حوزەیرانى ٢٠١٨ / ١١ی پووشپەڕ لە گوندی بەرمیزە لە برادۆست پێشوازیى لە سەربازانى سوپای تورکی داگیرکەر کرد و خوانى بۆ رێکخستن و بە گوندەکەدا گەڕاندنی. ئەرشەد حسێن لۆلانى دواتر لە ٣٠ی ئەیلولی ٢٠١٨ / ٨ی رەزبەر لە هەڵبژاردنى پەرلەمانى هەرێم دا هەڵبژێردرا و بووە پەرلەمانتاری پەدەکە.

ر.م