کۆمیتەی شەهیدان پەژاک بە بۆنەى ساڵیادى شەهید زاگرۆس بێریتان-ەوە راگەیاندراوێکى بڵاوکردەوە و رایگەیاند، تێکۆشانی هەڤاڵ زاگرۆس هاوشێوەى حەقی قەرار لە رۆژهەڵاتى کوردستان بووەتە بناغەیەکى بۆ گەشەسەندنى خەبات و تێکۆشان.

دەقی راگەیاندراوەکەى پەژاک

ئازادی لە ساتەکانی تێکۆشاندایە

ئەمرۆ ساڵیادی شەهادەتی هەڤاڵی تێکۆشەرمان (علی محمدی) ناسراو بە زاگرۆس بێریتانە.

هەڤاڵ زاگرۆس لە ساڵی ١٩٩٧ وە لەتەک بیر و ڕامانی سەرۆک ئاپۆ ئاشنا دەبێت. بە شەوق و هەیەجانێکی زۆرەوە خوازیاری بەشداری لە خەباتی ڕێکخستنی ناو شار دەبێت. لە ساڵی ١٩٩٨ بە شێوازێکی زۆر ئەکتیڤ و چالاکانەوە دەکەوێتە ناو کارو خەباتی ڕێکخستنی ناو شارەوە و گەلێك هەنگاوی زۆر پتەو و توکمە لە بواری ئاشناکردن و پێگەیاندنی گەلەکەمان لە شاری سنە و دەورووبەری هەڵدەگرێت. کە دەبێتە بناغەیەک بۆ تێکۆشانی بەردەوامی بزووتنەوەی ئازادیخوازی. بەڵام بەپێی بەرزبوون و پێگەیشتنی بیر و ڕامان و ئەندێشە و کەسایەتی شۆڕشگێڕی هەڤاڵ زاگرۆس بە شوێن مەجال و دەرفەتی گەورەتردا دەگەڕێت بۆ تێکۆشان و خەباتی بەربڵاوتر. دەرئەنجام لە ١٢/٨/٢٠٠٠ دا بە دڵێکی پڕ لە ئەوین و بڕواوە لە چیاکانی قەرەداغ یەکەم هەنگاوەکانی گەریلایی هەڵدەگرێت.

کەسایەتی شۆڕشگێری هەڤاڵ زاگرۆس لە ماوەی شەش ساڵ خەبات و تێکۆشانیدا بەردەوام لە هەڵکشان و گەشەکردندا بوو. هەموو ساتەکانی تێکۆشانی ئازادانە دەژیا. ئەرک و بەرپرسیاریەتی زۆر گەورە و گرنگی وە ئەستۆ گرتوە. بێ دوودڵی و دڵەڕاوکێ بۆ بەرەو پێشچوونی خەباتی ڕۆژهەڵاتی کوردستان بەردوەوامی بە خەبات دا. بەتایبەت لە قۆناغی سەرلەنوێ بونیادناوەی پەکەکەدا بە جۆش و ورەیەکی بەرزەوە بەشدار بوو، لەو چوارچێوەیەدا بوو بە کانگای موڕاڵ و وزە بۆ هەموو هاوڕێیان و هەڤاڵانی.

تەنانەت ئاستی خەبات و موڕاڵ بەرزی و پەیوەستبوونی بەو ئامانجەوە دەبێتە جێگای سەرنج و میناکی هەموو هەڤاڵان و ڕێوەبەری گشتی بزاڤی ئازادیخواز و بە وتەی هەڤاڵانی وەک هێمای حەقیقەراری ڕۆژهەڵات بەناو دەکرا. بۆ چۆنیەتیی خەبات و تێکۆشانی ئەو هەڤاڵەمان هەتا ئێستاش لە ڕۆژهەڵاتی کوردستاندا وەک سەردێڕێکی خەبات هەر دەگەشێنەوە و بەردەوام ئەزموونەکانی جێگای پێداچوونەوەی هەڤاڵانیەتی.

هەڤاڵ زاگرۆس بێریتان لە ٢١/٧/٢٠٠٥ لە ڕۆژێکی وەک ئەمرۆدا کەسەرقاڵی ڕاپەڕادنی دواین ئەرکە ڕاسپێردراوی بوو دەکەوێت بۆسەی سەربازانی ڕژێمی داگیرکەری کۆماری ئیسلامی و دەگاتە پلەی شەهادەت. لە ساڵیادی شەهادەتی هەڤاڵماندا جارێکی دیکە یادی بەرز ڕادەگرین و پەیمانمان دووبارە دەکەینەوە کە بۆ گەیشتن بە ئامانجەکانی زاگرۆس ئاسا لە تێکۆشاندا بین.

ر.م