حیزبى دیموکراتى ئەمریکا دەیەوێت لە هەڵبژاردنى مانگی داهاتوودا لە ئەنجوومەنى نوێنەران زۆرینە بەدەست بهێنێت.

ژنان لە ناوەندی شاری شیکاگۆ بە دروشمی "ئێمە تاوەکو سەر سندوقەکان دەڕۆین" کۆبوونەوە و سەرنجیان خستە سەر هەڵبژاردنى ئەنجوومەنى نوێنەران کە لە مانگى داهاتوودا دەستپێدەکات.

ژنان پۆستەرەکانى "دەنگ بدە، ژیانمان بەندە بە دەنگدانەوە" و "هەر دەنگێک پێویستە، چونکە هەڵبژاردنمان لە بەردەمە" بەرز کردبووە.

ترامپ لەمدواییانەدا برێت کاڤانوی بۆ ئەندامى ئەنجوومەنى دادگاى باڵاى ئەمریکا هەڵبژاردووە. هەڵبژاردنى کاڤانو کاردانەوە و ناڕەزایەتى لێکەوتووەتەوە، چونکە کاڤانو لە کاری تەحڕوش و پەلاماردانى ژنانەوە گلاوە.

خۆپیشاندەران جارێکیتریش لە مانگى ئەیلولی رابردوودا لە شارەکانى تەکساس، جۆرجیا و کارۆلیناى باشوور لە دژی سیاسەتەکانى ترامپ رژابوونە سەر شەقامەکان.

رێکخەرانى خۆپیشاندانەکە رایانگەیاندووە، چالاکییەکەیان بۆ پشتیوانیکردن لە حیزبێکى دیاریکراو نییە، بەڵام زۆربەى پاڵشتیى دارایى چالاکییەکە لەلایەن ئەو دەستە و کەسانەوە کۆکراوەتەوە، کە پشتیوانى لە حیزبی دیموکرات دەکەن.

لە چالاکییەکەى شیکاگۆدا پەیامێکى هیلاری کلینتۆن خوێندرایەوە، کە لە ساڵی ٢٠١٦دا رکابەریى دۆناڵد ترامپى دەکرد بۆ بەدەستهێنانى پۆستى سەرۆکایەتیى ئەمریکا.

ر.م