بەپێى راگەیاندراوی یەکێتیى ئەفریقا، ئەگەری ئەوە هەیە پەتای ڤایرۆسی کۆرۆنا ببێتە هۆی بێکاربوونی ٢٠ ملیۆن کەس و ئەوەش قەیران و قەرزێکى زۆر بە دوای خۆیدا دروست دەکات.

ئەگەر ئەو دۆخەى ئیستا بەردەوامیی هەبێت، لە کەرتی حکومەى و تایبەتدا لە کیشوەری ئەفریقا ٢٠ ملیۆن کەس بێکار دەبن. ئەو وڵاتانەى ئابوورییان لەسەر گەشتیاری و نەوتە لە بەردەم هەڕەشەیەکى گەورەدان.

لێکۆڵینەوەکەى یەکێتیى ئەفریقا لە ٣٥ لاپەڕە پێکهاتووە و باس لە دوو سیناریۆ دەکات. بەپێی سیناریۆی یەکەم پەتای ڤایرۆسی کۆرۆنا  تاوەکو مانگی تەمموز بەردەوامیی دەبێت و کاریگەرییەکى زۆر گەورەی لەسەر ئەفریقا نابێت، لە سیناریۆی دووەمیشدا باسی ئەوە کراوە، پەتاکە تاوەکو مانگی ئاب بەردەوامیی دەبێت و کاریگەریەکی زۆر لەسەر ئەفریقا دادەنێت.

لە ئەگەری روودانی هەر یەک لەو سیناریۆیانەدا کاریگەرییەکى زۆر خراپ و گەورە لەسەر ئابووری ئەفریقا دروست دەبێت. بەپێی سیناریۆی یەکەم رێژەى ٠.١ و بە پێی سیناریۆی دوەم رێژەى ١.١ لە گەشەی ئابووریی کیشوەری ئەفریقا کەم دەبێتەوە.

تاوەکو رۆژی دووشەممە لە ٥١ وڵاتی ئەفریقادا ٩ هەزار و ١٩٨ کەس تووشی ڤایرۆسی کۆرۆنا بوون و ٤١٤ کەسیش لەو وڵاتانەدا ژیانیان لە دەستداوە.

ژ.ت