ئیدارەو ۋېڕاوەبەری سەرنیشت و ۋەرکەوتوو سوریای پەیوەس بە هجومەکا هېزی (٨ و تشرینی یۋەمی) دەوڵەتوو ئەرەگیروو تورکی دژوو چن نوقتېوە جە دێرک و ڕەمیلان، ئەرەیاۋنېوە نۋیسیاش وەڵاکەرڎۊ.

ئەرەیاۋناکەی پی جۆرەنە:

"هجومەکۍ ڕژێمی فاشیستی تورکی پۍ سەروو هەرێمەکاما ساڵانێوەن بەردەوامېنۍ. ئامانج چنەش سەرۋنەشېویای و وەڵېگېرتەین جە کۊشیای گەلی و هێزە سەروازی و ئەمنییەکاما جە دژوو تیرۆری. هېزی ٨و تشرینی یۋەمی، جە دێرک و ڕەمیلان، هجومۍ ۋناوی پۍ سەروو فرەو نوقتا ڕووەشدا، دلېشانە ئەکادیمیاو ۋەرەنگاربیەیۊ مادەی هۆشبەری. ئی ئەکادیمیایە ٢٤ سەعاتۍ هەرمانە کەرۍ پۍ پارېزناو گلېرگەی جە کاریگەرییەکا مادەی هۆشبەری. حەرپاسە فرېوە جە یاگە نەوتییەکا و مەنتیقە مەدەنییەکا، چانیشایچ پڕۆژە کشتوکاڵییەکا دەگاو دەرباسیەی کریېنۍ ئامانج و ژمارېوە کرێکارۍ زامڎارۍ بیېنۍ. جە ئاکاموو هجومەکا هېزی و ئارۊینە ٢٩ ئەندامۍ هێزەکا ۋەرەنگاربیەیۊ مادەی هۆشبەری گەشمەرڎۍ بیۍ و ٢٨ ئەندامۍ زامڎارۍ بیۍ و ئاژەو بڕېشا سەختا. ئی هجومە دوژمنکارانە بە بێدەنگی میان نەتەوەیی ۋەران ۋەر بە کردەوەکا تورکی جە هەرێمەکامانە ڕووەشدا. وەڵتەر ئەرەیاۋنابېما کە بەردەوامی بێدەنگی میان نەتەوەیی ڕا بە دەوڵەتوو تورکی مڎۊ کۆکوژی زیاتەر ئەنجام بڎۊ. ئانەی شەوەی ۋیەردۍ ڕووەشدا پەیلواکایما سەلەمنۊ. ئی بێدەنگی و پەشتگۊش وستەیە زوڵم و ستەم و ڕژێموو فاشیستی زیاتەر کەرۊ. پەنەوازەن ڕای گرڎی بە ۋەرپرسیاری ئەخلاقیوە مامەڵە کەرۊ ۋەران ۋەر بە کردەوەکا ئی ڕژێمەیە ۋەران ۋەر بە گەلی و هەرێمەکاما.

ئا کردەوۍ دەوڵەتوو ئەرەگیروو تورکی ۋەروو چەما جەهانیۊ ئەنجامشا مڎۊ، شەرمەزارشا کەرمۍ. واوەیش کەرمېوە کە بێدەنگی میان نەتەوەیی پەشتیوانیېوە ڕاستەوخۆن پۍ دوژمنایەتی دەوڵەتوو تورکی ۋەران ۋەر بە گەلەکەیما. پەنەوازەن هەڵوێستۍ میان نەتەوەیی ڕۊشن بۊ ۋەران ۋەر بە پاشېلکاریەکا تورکیای جە دژوو هەرێمە ئارامەکاما و گەلەکەیما و هێزە سەروازییەکاما. هێز و گەلەکەما جە جەنگوو داعشی و تیرۆرینە هەزاران فیداکاریېشا دۍ و گرڎوو جەهانیشا جە داعشی پارېزنا. بەداخۊ جە سەردەمېوەنە کە گەلەکەما جە لایەن و هێزەکا پەشتیوان جە داعشیوە کۆکوژ کریۊ، گلېرگەی میان نەتەوەیی تەنیا تەماشە کەرۊ.

بەردەوامۍ بیمۍ جە پارېزنای گەلی و دەسکەوتەکاما. ئێمە پەشتی بە مافوو پارېزنای ڕەوای بەسمۍ، بەردەوامۍ بیمۍ جە بنیاڎنیای ئیراڎەو گلېرگەکەیما و پا گیری گلېرگەکەیما سەروو ژیۋایۍ شکۆمەندانەی.

ئێمە پۍ گیان و گەشمەرڎەکاما و شەرمەزارکەرڎەی ئی دوژمنکارییە، ٣ ڕۋۍ پەرسە ئەرەیاۋنمۍ".